بۇل تۋرالى قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ الاڭىندا وتكەن ءباسپاسوز كونفەرەنتسياسى بارىسىندا اۋىل شارۋاشىلىعى ءمينيسترى ەربول قاراشوكەەۆ حابارلادى. ونىڭ ايتۋىنشا, الەۋمەتتىك نان باعاسىنىڭ بىردەن وسۋىنە جول بەرىلمەيدى, دەپ جازادى Egemen.kz.
«ول ءۇشىن ءبىزدىڭ قولىمىزدا بارلىق قۇرالدار بار. قاجەتتى رەزەرۆ كولەمى دە جەتكىلىكتى, ول وتكەن جىلعى ەگىندى ەسەپكە العاندا, 1 ملن توننانى قۇرايدى. بۇل قوردى تەك استىققا عانا ەمەس, مال شارۋاشىلىعى سالاسىن قولداۋعا دا قولدانامىز. سوندىقتان الەۋمەتتىك ناننىڭ باعاسى بىردەن وسپەيدى. وسىعان بايلانىستى نان باعاسى قولجەتىمدى مولشەردە بولادى دەپ بولجايمىن», دەدى ۆەدومستۆو باسشىسى.
مەملەكەت باسشىسىنىڭ تاپسىرماسى بويىنشا ۇلتتىق جوبادا ەت, جەمىس, كوكونىس, قانت, ءداندى, مايلى داقىلدار, ءسۇت ونىمدەرىن ءوندىرۋ مەن وڭدەۋگە باسىمدىق بەرىلەدى. سونىمەن قاتار ءىرى ينۆەستيتسيالىق جوبالاردىڭ اينالاسىندا 7 ەكوجۇيە قالىپتاستىرىلادى. بۇل قوسىلعان قۇنى جوعارى تۇپكىلىكتى قازاقستاندىق ءونىم جاساۋعا قاتىسا الاتىن كەمىندە 350 مىڭ فەرمەرلىك جانە ءۇي شارۋاشىلىقتارىن ىسكە تارتۋعا مۇمكىندىك بەرەدى.