نۇر-سۇلتان قالاسىندا مانەرلەپ سىرعاناۋدان تانىمال سپورتشى بولعان دەنيس تەننىڭ قۇرمەتىنە حالىقارالىق تۋرنير وتەدى. بۇل تۋرالى قر مادەنيەت جانە سپورت ءمينيسترى اقتوتى رايىمقۇلوۆا ءمالىم ەتتى, دەپ حابارلايدى Egemen.kz.
«وتاندىق سپورتتا ەل نامىسىن قورعاپ, كوك تۋىمىزدى جەلبىرەتىپ جۇرگەن سپورتشىلار بارشىلىق. سونىڭ ءبىرى – دەنيس تەن. سپورتشى قىسقا ومىرىندە الەمدىك ارەنالاردا ءانۇرانىمىزدى ويناتىپ, تۋىمىزدى جەلبىرەتىپ ۇلگەردى. دەنيس تەننىڭ قۇرمەتىنە وراي سپورت قاۋىمداستارىمەن بىرلەسىپ كەڭ اۋقىمدى شارا وتكىزگەلى وتىرمىز. نەگىزى وتكەن جىلعا جوسپارلاعان ەدىك, پاندەميانىڭ سالدارىنان كەيىنگە شەگەرۋگە تۋرا كەلدى. ارينە دەنيس تەننىڭ قۇرمەتىنە بۇعان دەيىن دە ءتۇرلى شارالار ءوتىپ جاتىر, بىراق ولار اۋەسقوي دەڭگەيدە», دەدى اقتوتى رايىمقۇلوۆا ەلوردادا ءوتىپ جاتقان ۇلتتىق مەكتەپ سپورت ليگاسى بارىسىندا.
ءمينيستردىڭ ايتۋىنشا, «Denis Ten Memorial Challenge» اتتى مانەرلەپ سىرعاناۋدان حالىقارالىق تۋرنير وسىمەن ەكىنشى رەت ۇيىمداستىرىلىپ وتىر. جانە ول 28-31 قازان كۇندەرى ەلورداداعى «بارىس ارەنا» سپورتتىق كەشەنىندە وتەدى.
ايتا كەتسەك, مينيسترلىك ۇيىتقى بولعان شارانى ۇلتتىق وليمپيادا كوميتەتى مەن نۇر-سۇلتان قالاسىنىڭ اكىمدىگى قولداپ, «دەنيس تەن قورى» قوعامدىق مەكەمەسى ۇيىمداستىرىپ وتىر.
سونداي-اق حالىقارالىق تۋرنيرگە 20 مەملەكەتتەن 100 سپورتشى قاتىسادى دەپ كۇتىلۋدە.