ەل تاۋەلسىزدىگىنىڭ 30 جىلدىعىنا وراي جامبىل وبلىسىنىڭ اكىمى بەردىبەك ساپارباەۆتىڭ باستاماسىمەن تاراز قالاسىندا «اناعا تاعزىم» ورتالىعى اشىلدى. اتالعان ورتالىق «تارازعا تارتۋ» جوباسى اياسىندا بوي كوتەرگەن. بۇل نىساندى «ارايسترويماركەت» جشس ديرەكتورى ارمان ەدىلباەۆ ءوز قاراجاتىنا سالىپ بەرىپ وتىر. ورتالىق زامان تالابىنا ساي سالىنىپ, ۇلتتىق ناقىشتا بەزەندىرىلگەن. جۇمىس ىستەۋگە بارلىق مۇمكىندىك بار. ال الدىنا اقجاۋلىقتى انالاردىڭ قۇرمەتىنە ەڭسەلى ەسكەرتكىش ورناتىلعان.
«اناعا تاعزىم» ورتالىعىنىڭ اشىلۋىنا قاتىسقان وبلىس اكىمى ب.ساپارباەۆ وتكەننىڭ ونەگەسىن بۇگىنگى جاس بۋىننىڭ بويىنا ءسىڭىرۋ كەرەكتىگىن ايتىپ, ورتالىقتىڭ الداعى ۋاقىتتا اتقاراتىن جۇمىسىنا توقتالدى. «قانداي زاماندا دا ابزال انالارىمىز حالىقپەن بىرگە ەرلەرىنە سۇيەنىش, ەلىنە تىرەك بولا بىلگەن. ايشا ءبيبى, قىز جىبەك, مانشۇك, ءاليا سەكىلدى كوپتەگەن تۇلعالار ەل ومىرىندە ويىپ تۇرىپ ورىن الادى. نەبىر قيىن-قىستاۋ كەزەڭدەردە دە انالارىمىز تەك وتباسىنىڭ ۇيىتقىسى بولىپ قانا قويماي, اۋىرلىقتى ەڭسەرۋگە بەلسەنە ارالاستى. بابالارىمىزدان قالعان «اكە ۇلدى تاربيەلەيدى, انا تۇتاس ۇلتتى تاربيەلەيدى», دەگەن اسىل ءسوز بار. انا مەن بالانى قولداۋ, وتباسىلىق قۇندىلىقتاردى نىعايتۋ جانە دامىتۋ – مەملەكەتتىڭ الەۋمەتتىك ساياساتىنىڭ باستى باعىتتارىنىڭ ءبىرى. وسى ورايدا پايدالانۋعا بەرىلىپ وتىرعان «اناعا تاعزىم» ورتالىعى ءبىر جاعىنان سۇلۋلىق پەن ىزگىلىكتىڭ بەينەسى, ەكىنشى جاعىنان تۇتاس ەلىمىزدىڭ دامۋىنا ۇيىتقى بولار قازاقتىڭ اناسى دەگەن اتقا لايىق XXI عاسىر ايەلىنىڭ قالىپتاسۋىنا ىقپال ەتەدى دەپ ويلايمىن. بۇل جەر ارداقتى ايەل-انالارىمىز بەن قىز-كەلىنشەكتەرىمىز ءۇشىن ۇلتىمىزدىڭ قۇندىلىقتارىن دارىپتەي وتىرىپ, قازىرگى زاماننىڭ تالابىنا ساي قاسيەتتەردى بويىنا سىڭىرەتىن باسقوسۋ الاڭى بولادى دەپ ەسەپتەيمىن», دەدى. سونىمەن قاتار ب.ساپارباەۆ نىساندى سالىپ بەرگەن كاسىپكەر ارمان ەدىلباەۆقا جامبىلدىقتاردىڭ اتىنان العىس ايتتى. سونداي-اق كوپبالالى جانە از قامتىلعان انالاردىڭ ماسەلەلەرىنە قۇلاق ءتۇرىپ, ولاردى شەشۋ جولىنداعى ورتالىقتىڭ اتقاراتىن قىزمەتىنە توقتالدى. ۇسىنىس, وي-پىكىرلەر دە بارىنشا ەسكەرىلەتىن بولادى. ءتىپتى, قاجەت بولعان جاعدايدا جەرگىلىكتى اتقارۋشى ورگانداردىڭ وكىل-دەرى دە وسىندا شاقىرتىلىپ, ءتۇرلى ماسەلە بويىنشا قابىلداۋلار مەن كەزدەسۋلەر وتكىزىلەدى.
مەملەكەتتىك سىيلىقتىڭ لاۋرەاتى, «قۇنانباي» فيلمىندە ابايدىڭ اجەسى زەرەنىڭ بەينەسىن سومداعان اكتريسا نۇرسيفات سالىقوۆا ءوز سوزىندە اقىلمان, داناگوي ۇلى انالاردىڭ ىزگى جولىن دارىپتەي وتىرىپ, جاس ۇرپاققا, ونىڭ ىشىندە قىز بالالارعا رۋحاني-ادامگەرشىلىك تۇرعىدا تاربيە بەرۋدى ماقسات ەتكەن ورتالىق جۇمىسىنا ساتتىلىك تىلەپ, اق باتاسىن بەردى. سونىمەن قاتار سالتاناتتى شاراعا ەل اناسىنا اينالعان تانىمال تۇلعالار مەن ەلىمىزگە بەلگىلى ازاماتتاردى دۇنيەگە اكەلگەن ارداقتى انالار, سپورت پەن ونەردەگى قىز-كەلىنشەكتەر, سونداي-اق كاسىپكەر ايەلدەر مەن قوعام بەلسەندىلەرى قاتىستى. كوپبالالى انا ساپۋرا ەرجانوۆا وڭىردەگى انالارعا ايرىقشا كوڭىل ءبولىپ وتىرعان مەملەكەت باسشىسىنا, وبلىس اكىمىنە ريزاشىلىعىن جەتكىزدى. بۇدان كەيىن قوناقتارعا عيماراتتىڭ قۇرىلىمى تانىستىرىلىپ, قازاقى داستۇرمەن تۇساۋكەسەر ءراسىمى ءوتتى. «ارايسترويماركەت» جشس بيزنەستىڭ الەۋمەتتىك جاۋاپكەرشىلىگى اياسىندا سىيعا تارتقان ءۇش قاباتتى عيماراتتىڭ بارلىق زالى, ءدالىزى ۇلتتىق ناقىشتا بەزەندىرىلگەن. اتالعان ورتالىقتا جاس جانە كوپبالالى انالار ءۇشىن ءتۇرلى كۋرستار ۇيىمداستىرىلىپ, ولارعا پسيحولوگيالىق جانە قۇقىقتىق تۇرعىدان جان-جاقتى قولداۋ كورسەتىلەدى. ورتالىقتاعى «ميراس» ەكسپوزيتسيالىق زالىندا ۇلتتىق سالت-ءداستۇر بارىنشا ناسيحاتتالادى. «اناعا تاعزىم» ورتالىعىنىڭ ديرەكتورى ەلميرا مىرزا-عاليدىڭ ايتۋىنشا, مۇندا «سىرعالىم» سىرلاسۋ كلۋبى, «ەركە سىلقىم» حورەوگرافيالىق زالى, «قىزعالداق» ۇلتتىق ەكوتاربيە كلۋبى, «سىرلى الەم» بەينەلەۋ ونەرى جانە «انا ءتىلى» شەشەندىك ونەر مەكتەپتەرى, «قازىنا» ۇلتتىق اسپاپتار سىنىبى, «ىنتىماق» كوۆوركينگ زالى, «بەرەكە» اسپازدىق, «بويتۇمار» قولونەر جانە ديزاين ستۋديالارى جۇمىس ىستەيدى.