الدىنا جان سالمادى
بۇل كۇندەرى وماندا ۇستەل تەننيسىنەن جاسوسپىرىمدەر اراسىندا ءوتىپ جاتقان حالىقارالىق تۋرنيردە الان قۇرمانعاليەۆ تابىستى ونەر كورسەتۋدە.
14 جاستاعى قاراعاندى قالاسىنىڭ تۋماسى بيىلعى جىلدىڭ قاڭتار ايىندا ۇيىمداستىرىلعان ەرەسەكتەر اراسىنداعى قازاقستان چەمپيوناتىندا باس جۇلدەنى ولجالاپ, مايتالمان ماماندار مەن بارشا جانكۇيەردىڭ نازارىن وزىنە اۋدارعان ەدى. وعان دەيىنگى رەكوردتىق كورسەتكىش ەلىمىزدىڭ ءبىرىنشى راكەتكاسى كيريلل گەراسيمەنكوعا تيەسىلى ەدى. اتاقتى جەرلەسىمىزدىڭ 2012 جىلى 15 جاسىندا قارسىلاستارىن سىپىرا ۇتقانى ەسىمىزدە. مىنە, سول ناتيجەنى جاڭارتقان الان قازىرگى كەزدە ءتۇرلى حالىقارالىق دودادا ءوزىنىڭ تىرناقالدى تابىستارىنا قول جەتكىزىپ ءجۇر.
اراب تۇبەگىندە وتكەن جارىستا الان قۇرمانعاليەۆ جەڭىس تۇعىرىنا ەكى رەت كوتەرىلدى. ول 17 جاستاعى ويىنشىلار اراسىندا كۇمىس مەدالدى يەلەنسە, 15 جاستاعىلاردىڭ سايىسىندا باس جۇلدەنى ولجالادى.
ەكىنشى كەزەڭگە شىقتى
تەننيستەن يسپانيانىڭ اليكانتە قالاسىندا «چەللەندجەر» ساناتىنداعى حالىقارالىق تۋرنير باستالدى.
ءبىرىنشى اينالىمدا قازاقستاننىڭ ەكى وكىلى – دميتري پوپكو مەن دەنيس ەۆسەەۆ ءوزارا شەبەرلىك بايقاستى. قازىرگى كەزدە اتر رەيتينگىندە العاشقىسى 164-ورىندا تۇرسا, ەكىنشىسى 406-ساتىعا جايعاسقان. ءبىر-ءبىرىنىڭ قىر-سىرىن جاقسى بىلەتىن ويىنشىلار ءبىرىنشى سەتتە ابدەن تىرەستى. ءتىپتى سوڭعى ۇپايعا دەيىن تالاسىپ, بەرىسپەۋگە بەكىندى. اسا شيەلەنىستى وتكەن سايىس تاي-برەيككە دەيىن ۇلاسىپ, 7:6 ەسەبىمەن دەنيستىڭ پايداسىنا شەشىلدى. ەكىنشى سەتتە دە ول ءوزىنىڭ ۇستەمدىگىن پاش ەتتى – 6:4. وسىلايشا, 1 ساعات 54 مينۋتكە سوزىلعان سايىس ەۆسەەۆتىڭ جەڭىسىمەن اياقتالىپ, ول كەلەسى اينالىمعا ءوتتى. ەندى جەرلەسىمىز وزبەكستاننىڭ تانىمال تەننيسشىسى, اتر تۋرنيرلەرىنىڭ ەكى دۇركىن جەڭىمپازى دەنيس يستومينمەن كەزدەسەدى.
ال تيموفەي سكاتوۆ يتاليانىڭ نەاپول قالاسىندا ءوتىپ جاتقان ءتۋرنيردىڭ تۇساۋكەسەر كەزدەسۋىندە يسپانيالىق الۆارو لوپەس سان-مارتينگە ەسە جىبەردى – 3:6, 2:6.
كيتاكيۋسيۋدە كۇش سىناسادى
18-25 قازان ارالىعىندا جاپونيانىڭ كيتاكيۋسيۋ قالاسىندا سپورتتىق گيمناستيكادان الەم چەمپيوناتىنىڭ جالاۋى جەلبىرەيدى.
ايتۋلى دودادا 60-قا جۋىق مەملەكەتتەن 300-دەن اسا سپورتشى قاتىسادى دەپ كۇتىلۋدە. سولاردىڭ قاتارىندا قازاقستاننىڭ ۇلتتىق قۇراماسى دا بار. سوڭعى دايارلىق جۇمىستارىن رەسەيدىڭ پەنزا قالاسىندا پىسىقتاعان وتانداستارىمىز كۇنشىعىس ەلىنە ساقاداي ساي ازىرلىكپەن اتتانعالى وتىر. بۇل باسەكەدە ەل نامىسىن بەس سپورتشى قورعايدى. ولار – ميلاد كاريمي, ناريمان قۇربانوۆ, ءىلياس ءازيزوۆ, فارۋح نابيەۆ جانە يلفرات يماردجانوۆ. ەرەجەگە ساي ءبىر سناريادتا ءار كوماندا ساپىندا ءۇش سپورتشىدان باق سىنايدى. ال ەركىن جاتتىعۋدا ميلاد, ءىلياس جانە فارۋحقا سەنىم ارتىلىپ وتىر.
كوماندانىڭ باس باپكەرى الەكساندر كيمنىڭ ايتۋىنشا, ءبىزدىڭ جىگىتتەر كوپسايىس, ەركىن جاتتىعۋ, گيمناستيكالىق ات جانە كەرمەدەگى جاتتىعۋ سايىستارىندا فينالعا ءوتۋدى كوزدەيدى. ال باستى ماقسات – جاپونيادا ءبىر جۇلدەگە قول جەتكىزۋ.