تەننيس: دەنيس ەۆسەەۆ يسپانياداعى ءتۋرنيردىڭ ەكىنشى اينالىمىنا شىقتى

دۇنيەجۇزىلىك رەيتينگتە 406-ورىندا تۇرعان د.ەۆسەەۆ بۇل دوداعا ىرىكتەۋ سايىستارىنان كەيىن قوسىلعان ەدى. ول العاشقى اينالىمدا وتانداسى, الەمنىڭ 165-ءىنشى, وسى جارىستىڭ 5-راكەتكاسى دميتري پوپكومەن كەزدەستى.

بۇعان دەيىن قوس تەننيسشى ەكى رەت كەزدەسىپ, وندا پوپكو باسىم تۇسكەن ەدى. بۇل جولى ەكى ساعاتقا جۋىق سوزىلعان تارتىستى باسەكەدە 28 جاستاعى د.ەۆسەەۆ 7:6 (7:5), 6:4 ەسەبىمەن جەڭىسكە جەتتى.

ماتچ بارىسىندا د.ەۆسەەۆ 2 ەيس جاساپ, 8 برەيك-پوينتتىڭ ۇشەۋىن ءمۇلت جىبەرمەدى. قارسىلاسى 4 ەيس, 2 برەيككە (7 برەيك-پوينت) قول جەتكىزدى. د.ەۆسەەۆ شيرەك فينالعا شىعۋ ءۇشىن الەمنىڭ 224-راكەتكاسى, وزبەكستاندىق دەنيس يستومينمەن تالاسادى.

تاعى ءبىر قازاقستاندىق تيموفەي سكاتوۆ ناپولي (يتاليا) چەللەندجەر تۋرنيرىندە يسپانيالىق الۆارو لوپەس سان مارتيننەن 3:6, 2:6 ەسەبىمەن ۇتىلىپ قالدى.