بۇگىن ورال قالاسىندا «اتامەكەن» ونەر ورداسى اشىلدى, دەپ حابارلايدى Egemen.kz.
ونىڭ سالتاناتتى اشىلۋ راسىمىنە قاتىسقان قر پرەمەر-ءمينيسترىنىڭ ورىنباسارى ەرالى توعجانوۆ ەلىمىزدە الەۋمەتتىك سالادا مەملەكەت باسشىسى قاسىم-جومارت توقاەۆتىڭ قازاقستان حالقىنا ارناعان جولداۋىنا سايكەس كوپتەگەن ءىس-شارالاردىڭ قولعا الىنىپ جاتىرعانىن اتاپ ءوتتى.
«سونىڭ ىشىندە «اتامەكەن» ونەر ورداسىنىڭ اشىلۋى – ەلدىڭ مادەني ومىرىندەگى ايتۋلى وقيعالاردىڭ ءبىرى. الىستان قاراعاننىڭ وزىندە جۇرەگىڭدى باۋراپ الاتىن وسىنداي ەڭسەلى عيماراتتىڭ بوي كوتەرۋى – تاۋەلسىزدىگىمىزدىڭ ارقاسى. ەگەمەندىكتىڭ ارقاسىندا قازاقتىڭ سالتى دا, ءداستۇرى دە قايتا كوتەرىلدى. تاۋەلسىزدىك العاننان بەرگى كەزەڭدە ورالدا حاديشا بوكەەۆا اتىنداعى قازاق دراما تەاترى, قادىر مىرزا ءالي اتىنداعى مادەنيەت جانە ونەر ورتالىعى سىندى كورىكتى عيماراتتار سالىندى. مۇنىڭ ءبارى - ەلدىكتىڭ, بىرلىكتىڭ ارقاسى, ەلباسى نۇرسۇلتان نازارباەۆ باستاپ, حالقىمىز قولداپ, بىرلەسىپ اتقارعان جۇمىستاردىڭ ناتيجەسى.
جۋىردا قاسىم-جومارت كەمەل ۇلى ونەرى وركەندەگەن ەلدىڭ وزاتىنى جونىندە اتاپ وتكەن بولاتىن. وسىنداي ونەر ورداسى ارقاسىندا ەلدىڭ رۋحى كوتەرىلەدى, نامىسى اسقاقتاي تۇسەدى», دەدى ە.توعجانوۆ.
اق جايىقتىڭ زيالى قاۋىم وكىلدەرى اتىنان بەلگىلى اقىن, مەملەكەتتىك سىيلىقتىڭ يەگەرى اقۇشتاپ باقتىگەرەەۆا ءسوز الدى.
«الەكساندر زاتاەۆيچتىڭ «ماعان بۇكىل قازاق دالاسى ءان سالىپ تۇرعانداي كورىنەدى» دەگەنىندەي, بۇگىن بارشا اق جايىق ءوڭىرى ءان سالىپ تۇرعانداي. وسى جەردە ۇلى قۇرمانعازى كۇيشىنىڭ ءىزى جاتىر. ەگەر قۇرمانعازىعا ەۋروپالىق ءبىلىم بەرسە, بەتحوۆەن, پاگانينيلەرمەن قاتار تۇرار ەدى-اۋ دەگەن سوزدەردى تىڭدادىق. ەگەمەندىكتىڭ ارقاسىندا ۇلى دالا ۇل-قىزىنىڭ داۋسىن كۇللى الەم ەستىدى. كەمەڭگەر جازۋشىمىز ءابىشتىڭ ايتقانىنداي, قازاقتىڭ ۆەناسى اتانعان ورالدا وسىنداي سالتاناتتى ونەر ورتالىعىنىڭ اشىلۋىنا جەتتىك. بۇگىن – تالاي ادامنىڭ ارمانى ورىندالعان كۇن», دەدى ا.باقتىگەرەەۆا.
«قپو ب.ۆ.» كومپانياسىنىڭ باس ديرەكتورى دجانكارلو رۋيۋ جۇرتشىلىقتى ورالدا وسىنداي مادەنيەت سارايىنىڭ اشىلۋىمەن قۇتتىقتاپ, ىزگى تىلەگىن جەتكىزدى.
بۇدان كەيىن مەيماندار «اتامەكەن» ونەر ورداسىنا كىرىپ, زال, بولمەلەرىمەن تانىستى. كورەرمەندەر ايمان مۇساقوجاەۆا, ءبىرجان حاسانعاليەۆ, دينا حامزينا جانە باسقا ونەر مايتالماندارى قاتىسقان «اسقاق اتامەكەن» اتتى كونتسەرتتىك باعدارلامانى تاماشالادى.
«اتامەكەن» ونەر ورداسى «قپو ب.ۆ.» كومپانياسىنىڭ الەۋمەتتىك ينۆەستيتسيالارى ەسەبىنەن سالىندى. قۇنى – 9,5 ملرد جۋىق تەڭگە. باس مەردىگەرى – «التاير» جشس. 20 مىڭعا جۋىق شارشى مەتردى الىپ جاتقان ءۇش قاباتتى عيماراتتىڭ اكت زالى 926 ادامعا ەسەپتەلگەن. بۇدان باسقا كورمە زالى, جينالىس وتكىزەتىن, سونداي-اق كونفەرەنتس-زال دا بار. تاعى ءبىر ەرەكشەلىگى, ساحنا 360 گرادۋسقا بۇرىلادى. وندا وركەستر وتىراتىن ارنايى ورىن دا بار.