مينيستر قازاقستان كاسىپوداقتارىن كاسىبي مەرەكەسىمەن قۇتتىقتادى

«قر ەڭبەك جانە حالىقتى الەۋمەتتىك قورعاۋ مينيسترلىگىنىڭ اتىنان كاسىپوداق ۇيىمدارىنىڭ قىزمەتكەرلەرىن كەلە جاتقان قازاقستاننىڭ كاسىپتىك وداقتارى كۇنىمەن قۇتتىقتايمىن!

بۇگىندە الەۋمەتتىك ارىپتەستىكتىڭ بارلىق دەڭگەيلەرىندە كاسىپوداقتار قۇرىلىپ, جۇمىس ىستەۋدە, ولاردىڭ قۇرامىنا 3 ملن.-نان استام جۇمىسكەر كىرەدى. ولاردىڭ ىشىندە 23 سالالىق كاسىپوداقتى, 17 اۋماقتىق كاسىپوداقتار بىرلەستىگىن جانە 17 مىڭنان استام باستاۋىش كاسىپوداق ۇيىمىن بىرىكتىرەتىن كاسىپوداقتار فەدەراتسياسى ەڭ وكىلدى جانە جاپپاي كاسىپوداق ۇيىمى بولىپ تابىلادى.

كاسىپوداقتار فەدەراتسياسى قازاقستان تاۋەلسىزدىگىمەن قۇرداس جانە بيىل ونىڭ 30 جىلدىعىن اتاپ وتۋدەمىز. وسى جىلدار ىشىندە كاسىپوداقتار فەدەراتسياسى ەكونوميكالىق دامۋ جانە قوعامداعى الەۋمەتتىك تۇراقتىلىق ماقساتتارىنا قول جەتكىزۋدە ءوزىن بەلسەندى قاتىسۋشى جانە ۇكىمەتتىڭ ارىپتەسى رەتىندە كورسەتتى.

بۇعان مىسال – 2021-2023 جىلدارعا ارنالعان جاڭا قر ۇكىمەتى, جۇمىس بەرۋشىلەردىڭ رەسپۋبليكالىق بىرلەستىكتەرى جانە جۇمىسكەرلەردىڭ رەسپۋبليكالىق بىرلەستىكتەرى اراسىنداعى باس كەلىسىمنىڭ جوباسىمەن جاسالعان جۇمىس. كاسىپوداقتار فەدەراتسياسى ءوز الاڭىندا العاش رەت بارلىق رەسپۋبليكالىق كاسىپوداقتار بىرلەستىكتەرىن بىرىكتىرىپ, كەيىننەن اعىمداعى جىلدىڭ ناۋرىز ايىندا قول قويىلعان باس كەلىسىمنىڭ نەگىزىن قۇراعان قۇجاتتىڭ جوباسىن دايىندادى.

باس كەلىسىم شەڭبەرىندە مەملەكەتتىڭ ستراتەگيالىق جانە باعدارلامالىق قۇجاتتارىن ەسكەرە وتىرىپ, تاراپتاردىڭ الەۋمەتتىك-ەكونوميكالىق دامۋ جونىندەگى نەگىزگى مىندەتتەمەلەرى بەكىتىلگەن:

- حالىقارالىق ەڭبەك ۇيىمىنىڭ ۇسىنىمدارىنا سايكەس ەڭ تومەنگى مەملەكەتتىك الەۋمەتتىك ستاندارتتاردى جانە الەۋمەتتىك قامسىزداندىرۋ نورمالارىن كەزەڭ-كەزەڭىمەن ارتتىرۋ جونىندەگى ماسەلەلەردى قاراۋ;

- ءوز مۇشەلەرىنىڭ ەڭبەك قۇقىقتارى مەن مۇددەلەرىن ءبىلدىرۋ جانە قورعاۋ بويىنشا كاسىپوداقتار مەن جۇمىس بەرۋشىلەر بىرلەستىكتەرىنىڭ ءرولىن ارتتىرۋ.

بۇگىنگى كۇنى مەملەكەتكە ەڭبەك قاتىناستارى سۋبەكتىلەرىنىڭ مۇددەلەرىن وڭتايلى ۇيلەستىرۋگە قول جەتكىزە الاتىن كۇشتى جانە جاۋاپتى كاسىپتىك وداقتار اسىرەسە قاجەت.

بىرلەسكەن كۇش-جىگەرىمىزبەن ءبىز قازاقستان رەسپۋبليكاسىندا 2025 جىلعا دەيىن قاۋىپسىز ەڭبەكتى قامتاماسىز ەتۋ جونىندەگى ءىس-قيمىل جوسپارىن ازىرلەدىك. جوسپاردا كوزدەلگەن ءىس-شارالاردى ىسكە اسىرۋ ناتيجەسىندە 2025 جىلعا قاراي وندىرىستىك جاراقاتتانۋ 10%-عا تومەندەيدى دەپ كۇتىلۋدە.

الەۋمەتتىك شيەلەنىستىڭ الدىن الۋ جانە الەۋمەتتىك-ەڭبەك جانجالدارىن شەشۋ جونىندەگى كەشەندى جوسپار ىسكە اسىرىلۋدا. قابىلدانىپ جاتقان شارالاردىڭ ناتيجەسىندە بيىل 300-گە جۋىق ەڭبەك داۋىنىڭ الدىن الۋعا, سونداي-اق 20 مىڭ جۇمىسكەر الدىندا 4,7 ملرد تەڭگەدەن استام سوماعا جالاقى بەرەشەگىن وتەۋدى قامتاماسىز ەتۋگە قول جەتكىزىلدى.

كاسىپوداقتاردىڭ كومەگىمەن جۇمىسكەرلەرگە ارنالعان قوسىمشا الەۋمەتتىك پاكەتتەردى كوزدەيتىن ۇجىمدىق شارتتارمەن قامتۋ 98,4%-دى قۇرايدى.

رەسپۋبليكا كاسىپورىندارىندا 15 مىڭ وندىرىستىك كەڭەس قۇرىلدى جانە جۇمىس ىستەيدى, ولاردىڭ مىندەتتەرىنە ەڭبەكتى قورعاۋ جونىندەگى 17 مىڭنان استام تەحنيكالىق ينسپەكتوردىڭ قاتىسۋىمەن جۇمىس ورىندارىنداعى ەڭبەك جاعدايلارىن تەكسەرۋدى ۇيىمداستىرۋ كىرەدى.

ەلىمىزدىڭ 216 كاسىپورنى حالىقارالىق الەۋمەتتىك قامسىزداندىرۋ قاۋىمداستىعى ازىرلەگەن «Vision Zero» نولدىك جاراقاتتانۋ تۇجىرىمداماسىن ەنگىزدى.

كاسىپوداقتار فەدەراتسياسى قر تۇڭعىش پرەزيدەنتى قۇرعان بيزنەستىڭ الەۋمەتتىك جاۋاپكەرشىلىگى جونىندەگى «پارىز» رەسپۋبليكالىق كونكۋرسىن ۇيىمداستىرۋعا ۇلكەن ۇلەس قوسۋدا.

اعىمداعى جىلى ءبىزدى قازاقستان رەسپۋبليكاسىندا الەۋمەتتىك كودەكس پەن 2030 جىلعا دەيىنگى قاۋىپسىز ەڭبەك تۇجىرىمداماسىن ازىرلەۋ بويىنشا ۇلكەن بىرلەسكەن جۇمىس كۇتىپ تۇر.

قازاقستاننىڭ بارلىق كاسىپوداق ۇيىمدارىنىڭ قىزمەتكەرلەرىن كاسىبي مەرەكەلەرىمەن تاعى دا قۇتتىقتايمىن! جۇمىس ىستەيتىن قازاقستاندىقتاردىڭ قۇقىقتارى مەن مۇددەلەرىن قورعاۋعا قوسىپ جاتقان باعا جەتپەس ۇلەستەرىڭىز ءۇشىن راقمەت! سىزدەرگە الداعى ۋاقىتتا دا بەلسەندى ءارى جەمىستى جۇمىس تىلەيمىن», دەپ جازىلعان سەرىك شاپكەنوۆتىڭ قۇتتىقتاۋىندا.