تەننيستەن اقش-تىڭ ينديان-ۋەللس قالاسىندا جىل سايىن ءداستۇرلى تۇردە ءوتىپ تۇراتىن اسا ءىرى حالىقارالىق ءتۋرنيردىڭ شىمىلدىعى ءتۇرىلدى. ادەتتەگىدەي بۇل جارىستا كىل مىقتىلار عانا ونەر كورسەتەدى. ال ورتاڭقول ويىنشىلار باق سىناعىسى كەلسە, وندا ولارعا ىرىكتەۋ تۋرنيرىنە قاتىسۋعا تۋرا كەلەدى. سول سىناقتان سۇرىنبەي وتكەندەر عانا ۇزدىكتەرمەن كۇش سىناسۋ مۇمكىندىگىنە يە بولادى.
وزگەلەردى ايتپاعاندا, اتاعى الىسقا جايىلعان تەننيسشىلەردىڭ وزدەرى «ماستەرس» ساناتىنا جاتاتىن ايتۋلى تۋرنيردە ونەر كورسەتۋدى ۇلكەن مارتەبە سانايدى. سەبەبى وسى باسەكەلەرگە قاتىسۋ ارقىلى ويىنشىلار الەمدىك رەيتينگتە جوعارىلاپ قانا قويماي, ماتەريالدىق جاعدايلارىن جاقسارتا تۇسەدى. ماسەلەن, بيىل ينديان-ۋەللستەگى جارىستىڭ جۇلدە قورى
8 359 455 اقش دوللارىن قۇراپ وتىر. تارقاتىپ ايتساق, ەرلەر مەن ايەلدەر اراسىنداعى باس جۇلدە يەگەرلەرىنىڭ ارقايسىسى
1 209 730 دوللاردان الادى. اقتىق سايىستا جەڭىلىس تاپقاندار سول سومانىڭ تەڭ جارتىسىن يەلەنەدى. جارتىلاي فينالعا جەتسەڭىز ەسەپشوتىڭىزعا 335 مىڭ دوللار اۋدارىلادى. شيرەك فينالعا شىققاندار 175 مىڭ دوللاردى ەنشىلەيدى. ءتورتىنشى جانە ءۇشىنشى كەزەڭگە جەتكەن ويىنشىلارعا دا تيەسىلى اقشا از ەمەس. ولارعا شامامەن 92 مىڭ جانە 52 مىڭ دوللار بەرىلەدى. ءتىپتى وسى دودادا بوي كورسەتىپ, العاشقى اينالىمنان اسا الماعان جاعدايدىڭ وزىندە 18 155 دوللاردى قالتاعا باساسىز.
جەر-جاھاندى جايلاعان پاندەميانىڭ سالدارىنان بىلتىر بۇل جارىس وتپەي قالدى. ال 2019 جىلى ۇيىمداستىرىلعان دودادا ەرلەر اراسىندا اۋستريالىق دومينيك تيم الدىنا جان سالمادى. فينالدا ول داڭقتى رودجەر فەدەرەردىڭ ءوزىن 3:6, 6:3, 7:5 ەسەبىمەن سان سوقتىردى. ايەلدەر سايىسىندا باس جۇلدە ءۇشىن تارتىس گەرمانيالىق انجەليكا كەربەر مەن كانادالىق بيانكا اندرەەسكۋ اراسىندا ءوربىدى. بۇل باسەكە 6:4, 3:6, 6:4 ەسەبىمەن ۇيەڭكى جاپىراقتار ەلىنەن كەلگەن قىزدىڭ پايداسىنا شەشىلدى.
بيىلعى جارىسقا ءتۇرلى سەبەپتەرگە بايلانىستى « ۇلى ۇشتىك» دەگەن تەڭەۋ تاعىلعان نوۆاك دجوكوۆيچ, رافاەل نادال جانە رودجەر فەدەرەر سىندى ساڭلاقتار قاتىسپايدى. وسىنىڭ الدىنداعى جەڭىمپاز دومينيك تيم دە بوي كورسەتپەيتىن بولدى. بىراق ودان جارىستىڭ قىزىعى ەش كەمىپ قالمايتىنى انىق. سەبەبى كورتقا شىعاتىندار قاتارىندا باسقا دا جۇلدىزدار جەتىپ ارتىلادى. ولاردىڭ بارلىعى دا ينديان-ۋەللستە بارىمىزدى سالامىز دەپ قۇلشىنىپ وتىر.
ءتۋرنيردىڭ العاشقى كۇنى قازاقستاننىڭ ەكى تەننيسشىسى كورتقا شىقتى. يۋليا پۋتينتسەۆا گەرمانيالىق اندرەا پەتكوۆيچتەن باسىم ءتۇستى – 7:6, 6:1. كەشە زارينا دياس جاپونيالىق ناو حيبينومەن سايىسسا, ەلەنا رىباكينا رەيتينگىنىڭ جوعارىلىعىنا بايلانىستى جارىستى ەكىنشى كەزەڭنەن باستايدى. ال ميحايل كۋكۋشكين ىرىكتەۋ سىنىنىڭ فينالىندا امەريكالىق ەرنەستو ەسكوبەدودان ۇتىلىپ قالدى – 2:6, 4:6.