مادريدتە قر Cاۋدا جانە ينتەگراتسيا ۆيتسە-ءمينيسترى قايرات تورەباەۆ پەن يسپانيانىڭ ساۋدا جونىندەگى مەملەكەتتىك حاتشىسى شيانا مارگاريدا مەندەس بەرتولونىڭ تەڭ توراعالىعىمەن ەكونوميكا جانە ونەركاسىپ سالاسىنداعى ىنتىماقتاستىق جونىندەگى قازاقستان-يسپان ۇكىمەتارالىق ارالاس كوميسسياسىنىڭ 9-شى وتىرىسى ءوتتى, دەپ جازادى Egemen.kz.
ساۋدا, ونەركاسىپ, كولىك, دەنساۋلىق ساقتاۋ, ەكولوگيا سالاسىنداعى ىنتىماقتاستىقتى دامىتۋدىڭ جاي-كۇيى مەن پەرسپەكتيۆالارى تالقىلاندى, سونداي-اق ەكى ەلدىڭ تاۋار مەن قىزمەت نارىعىنا قولجەتىمدىلىكتى جاقسارتۋ مۇمكىندىگى قارالدى.
ۆيتسە-مينيستر ق.تورەباەۆ جانە مەملەكەتتىك حاتشى ش. مەندەس قازاقستان-يسپانيا ۇكىمەتارالىق كوميسسياسىنىڭ ماڭىزدى ءرولىن اتاپ ءوتىپ, ەلدەر اراسىنداعى ەكىجاقتى ساۋدا-ەكونوميكالىق قاتىناستاردى ودان ءارى تەرەڭدەتۋ جانە ءارتاراپتاندىرۋ تۋرالى ايتتى.
وسىعان بايلانىستى, كوميسسيانىڭ تەڭ توراعالارى ساۋدا اينالىمىنىڭ كولەمىن ارتتىرۋ بويىنشا ناقتى باستامالارمەن الماستى. وسىلايشا, قايرات تورەباەۆ يسپاندىق ارىپتەستەرىنە 75 تاۋار پوزيتسياسىن جەتكىزۋ ماسەلەسىن بىرلەسىپ پىسىقتاۋدى ۇسىندى. ولار بويىنشا قازاقستاندىق كاسىپورىندار شيكىزاتتىق ەمەس ەكسپورتتى $ 620 ملن جەتكىزە الادى.
قازاقستاندىق بولىكتىڭ تەڭ توراعاسى قايرات تورەباەۆ قازاقستاندىق ەكسپورتتى ىلگەرىلەتۋ بولىگىندە ىنتىماقتاستىقتى جولعا قويۋ ءۇشىن «MAXAM», «CESCE», ICEX جانە AJUSA مەملەكەتتىك كومپانيالارىنىڭ باسشىلارىمەن بىرقاتار جۇمىس كەزدەسۋلەرىن وتكىزدى.
ۇكىمەتارالىق كوميسسيا شەڭبەرىندە ايدار ءارىپحانوۆ («بايتەرەك» ۇبح» اق باسقارما توراعاسى) پەن «ماحام» كومپانياسىنىڭ پرەزيدەنتى حوسە مانۋەل ۆارگاستىڭ تەڭ توراعالىعىمەن «قازاقستان-يسپانيا» ىسكەرلىك كەڭەسى وتكىزىلدى.
ىسكەرلىك كەڭەسكە ەكى ەل اراسىنداعى ساۋدا-ەكونوميكالىق بايلانىستاردى دامىتۋعا مۇددەلى ونەركاسىپ, اۋىل شارۋاشىلىعى, كولىك, ينفراقۇرىلىم, ينجينيرينگ, اقپاراتتىق تەحنولوگيالار سالاسىنداعى قازاقستاندىق جانە يسپاندىق كومپانيالاردىڭ 80-نەن استام وكىلى قاتىستى. ىسكەرلىك كەڭەستىڭ اشىلۋىندا ۇكىمەتارالىق كوميسسيانىڭ تەڭ توراعالارى ءسوز سويلەدى, ولار بيزنەستىڭ ەكى ەل نارىعىنداعى قىزمەتىن جانداندىرۋعا شاقىردى.
ىسكەرلىك كەڭەستىڭ قورىتىندىسى بويىنشا قازاقستان دامۋ بانكى (قدب) مەن CESCE, قدب جانە COFIDES, «قازىنا كاپيتال مەنەدجمەنت» اق جانە COFIDES اراسىندا ءوزارا تۇسىنىستىك تۋرالى مەموراندۋمعا قول قويىلدى.
«2021 جىلعى 8 ايدا ەلدەر اراسىنداعى ءوزارا ساۋدا 68% - عا ءوسىپ, $1.2 ملرد قۇرادى, بۇل رەتتە قازاقستاننان يسپانياعا ەكسپورت 83,8% - عا ($1,1 ملرد.) ۇلعايدى», دەپ جازادى ساۋدا جانە ينتەگراتسيا مينيسترلىگى.