قازاقستان قارۋلى كۇشتەرى باس شتابى بايلانىس دەپارتامەنتىنىڭ باستىعى, پولكوۆنيك ارمان قاليجانوۆ تمد-عا مۇشە مەملەكەتتەر قارۋلى كۇشتەرى بايلانىس باسشىلارىمەن وتكەن ۇيلەستىرۋ كوميتەتىنىڭ كەزەكتى وتىرىسىنا قاتىستى, دەپ حابارلايدى Egemen.kz قورعانىس مينيسترلىگىنە سىلتەمە جاساپ.
ارمەنيا, بەلارۋس, قازاقستان, قىرعىزستان, رەسەي جانە تاجىكستان قارۋلى كۇشتەرى بايلانىس اسكەرلەرىنىڭ باسشىلارى بىرىككەن بايلانىس جۇيەسىن قۇرۋ, ونىڭ جۇمىس ىستەۋى جانە دامىتۋ بويىنشا ورىندالعان جانە جوسپارلانعان ءىس-شارالاردى, بىرلەسكەن وقۋ-جاتتىعۋلاردى وتكىزۋ كەزىندە بايلانىستى ۇيىمداستىرۋ ەرەكشەلىكتەرىن جانە باسقا دا ۇيىمداستىرۋ ماسەلەلەرىن تالقىلادى.
وتىرىس قورىتىندىسىندا ۇيلەستىرۋ كوميتەتىنىڭ الداعى بەس جىلعا ارنالعان جۇمىس جوسپارى قابىلداندى. سونىمەن قاتار, تمد-عا مۇشە مەملەكەتتەر قارۋلى كۇشتەرىنىڭ بايلانىس توراپتارىمەن كەلەسى جىلعا ارنالعان بىرلەسكەن جاتتىعۋلار كەستەسى بەكىتىلىپ, كەزەكتى بىرلەسكەن كەڭەستىڭ باستاپقى كۇن ءتارتىبى تالقىلاندى.