قاراعاندى جاستارى قالانىڭ تازا بولۋىن جانىمەن قالايدى جانە دە ولار مۇنىسىن ىسپەن دالەلدەپ ءجۇر. مىسالى, جۋىردا عانا قالاداعى كوللەدجدەردىڭ ستۋدەنتتەرى «تازالىق كۇنى» اكتسياسى اياسىندا وتكەن سپورتتىق پلوگگينگكە قاتىسىپ, اينالانى قوقىستان تازارتتى.
ەسكە سالا كەتسەك, شۆەتسيادا پايدا بولعان بۇل پلوگگينگ «جۇگىرە قوقىس جيناۋ جارىسى» دەگەن ماعىنانى بىلدىرەدى. قازىرگى ۋاقىتتا سالاماتتى ءومىر سالتى مەن ەكولوگياعا قامقورلىقتى بىرىكتىرەتىن بۇل ۇعىم الەم بويىنشا جاڭا فيتنەس-ترەند رەتىندە كەڭىنەن تارالىپ كەلەدى.
ال كەنشىلەر استاناسىنداعى پلوگگينگ باستالار الدىندا «ەكوجاستار» مەكتەبىنىڭ ەكوترەنەرلەرى قوقىستى دۇرىس جيناۋ جانە سۇرىپتاۋ بويىنشا شەبەرلىك ساباعىن وتكىزدى.
ءىس-شارانى ۇيىمداستىرۋشىلاردىڭ ءبىرى – قاراعاندى جوعارى پوليتەحنيكالىق كوللەدجى ديرەكتورىنىڭ تاربيە ءىسى جونىندەگى ورىنباسارى ازامات ەكىجانوۆ پلوگگينگتىڭ شىن مانىندە سپورتتىق سەنبىلىك ەكەنىن اتاپ ءوتتى.
– مۇنداي فورمات قاتىسۋشىلارعا سپورتپەن شۇعىلدانۋعا عانا ەمەس, سونىمەن قاتار ءوز قالاسىن تازا ۇستاۋعا مۇمكىندىك بەرەدى, – دەدى ول.
«تازالىق كۇنى» اكتسياسى بارىسىندا ەڭ جىلدام جانە ەڭ كوپ قوقىس جيناعاندار اراسىندا بايقاۋ ۇيىمداستىرىلىپ, جەڭىمپازدار انىقتالدى. بۇل سايىستا قاراعاندى جوعارى پوليتەحنيكالىق كوللەدجى جەڭىمپاز اتانسا, 2-ءشى جانە 3-ورىنداردى سايكەسىنشە ءا.مولداعۇلوۆا اتىنداعى وبلىستىق مامانداندىرىلعان مەكتەپ-ينتەرنات-كوللەدج بەن قاراعاندى ماشينا جاساۋ كوللەدجى يەلەندى. بايقاۋ جەڭىمپازدارى مەن جۇلدەگەرلەرى Sportident ەلەكتروندى بەلگى جۇيەسىنىڭ كومەگىمەن انىقتالدى.
«سارىارقا دارىنى» وڭىرلىك عىلىمي-پراكتيكالىق ورتالىعى باسشىسىنىڭ ورىنباسارى اسحات كاكەتاەۆ وسىنداي جارىستاردى وتكىزۋگە بولاتىن ورىندار سانىن ارتتىرۋ جوسپاردا بار ەكەنىن ايتادى. سونداي-اق ول پلوگگينگ پىشىمىندەگى سەنبىلىكتەردىڭ جاستار اراسىندا تانىمال بولىپ كەلە جاتقانىن, مۇنىڭ ءوزى قالا تۇرعىندارىنىڭ نازارىن ەكولوگيا پروبلەمالارىنا اۋداراتىن تاپتىرماس قۇرال ەكەنىن جەتكىزدى.
قاراعاندى