جەر ءجانناتى جەتىسۋدىڭ كىندىك قالاسى – تالدىقورعان تەاترى 1975 جىلى عابيت مۇسىرەپوۆتىڭ «قوزى كورپەش-بايان سۇلۋ» تراگەدياسى بويىنشا قويىلعان سپەكتاكلىمەن شىمىلدىعىن اشقان ەدى.
بۇگىندە وڭىردەگى قازاق ونەرىنىڭ قارا شاڭىراعىنا اينالعان بۇل تەاتر 39 جىلدان بەرى حالىققا ءمىنسىز قىزمەت ەتىپ كەلەدى. 2000 جىلى تەاترعا قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى بيكەن ريموۆانىڭ اتى بەرىلدى. «بۇگىنگى تاڭدا تەاترىمىزدا 86 ادامنىڭ 27-ءسى شىعارماشىلىق توپتى قۇرايدى. ولاردىڭ بىرەۋى قازاقستاننىڭ حالىق ءارتىسى بولسا, تاعى بىرەۋى قازاقستاننىڭ ەڭبەك سىڭىرگەن ءارتىسى. ال قازاقستاننىڭ ەڭبەك سىڭىرگەن قايراتكەرى ۇشەۋ. ونەر يەلەرىنىڭ اراسىندا «قۇرمەت», «پاراسات» وردەندەرىنىڭ, «ەرەن ەڭبەگى ءۇشىن» مەدالىنىڭ يەگەرى بار. تەاتر ارتىستەرى ب.ريموۆانىڭ 90, مۇقان تولەباەۆتىڭ 100 جىلدىعىنا ارنالعان مەرەيتويلاردا ەل ەسىندە قالعان كورىنىستى كورسەتىپ قانا قويماي, مۇمكىندىكتەرگە وراي وزگە وڭىرلەرگە ات ءىزىن سالىپ حالىق قوشەمەتىنە بولەنۋدە», – دەدى الماتى وبلىستىق مادەنيەت, مۇراعاتتار جانە قۇجاتتاما باسقارماسىنىڭ باسشىسى راحمەت ەسداۋلەتوۆ. ارينە, جەتىستىكتەرمەن قاتار, الدا اتقارۋعا ءتيىس تەاتر ۇجىمىنىڭ وزەكتى ماسەلەلەرى دە بارشىلىق. سونىڭ ءبىرىن اتاپ ايتار بولساق, تەاتر عيماراتى 1980 جىلى قۇرىلىسشىلاردىڭ مادەنيەت ءۇيى بولىپ سالىنعان ەكەن. سوندىقتان دا كاسىبي تەاتردىڭ باستى تالاپتارىنا ساي كەلمەيدى. جاڭا تەاتر عيماراتىن سالۋ قاجەتتىگى تۋىنداپ وتىر. بۇل ءبىر. ەكىنشىدەن, جىل سايىن دارىندى قىزمەتكەرلەرگە رەسپۋبليكالىق, حالىقارالىق دەڭگەيدەگى ءارتۇرلى گرانتتار مەن ارناۋلى ستيپەنديالار تاعايىندالىپ, ونەر ۇجىمىنىڭ شەتەلدەرمەن مادەني بايلانىسىن نىعايتۋ ءۇشىن حالىقارالىق فەستيۆالدەرگە قاتىسۋعا قولداۋ جاسالىپ جاتسا قۇبا-قۇپ. تاعى ءبىر وزەكتى ماسەلە, جاس مامانداردىڭ باسپاناسى بولىپ وتىر. يپوتەكا الۋعا ولاردىڭ قازىرگى ايلىق جالاقىسى جەتپەيدى. ءدال وسى تۇستا ورايى كەلگەن ءبىر ۇسىنىس, ايلىق تابىسى مينيسترلىككە قاراستى تەاتر اكتەرلەرىنىڭ الاتىن كاتەگوريالارىمەن تەڭەستىرىلۋ جولدارى قاراستىرىلسا ءجون بولار ەدى. تەاتردىڭ 40 جىلدىعى تاياپ كەلەدى. وسىعان وراي, ارتىستەرگە ءتيىستى ورىندار تاراپىنان قولداۋ كورسەتىلسە ونەردىڭ مەرەيى ءوسىپ, ابىرويى ارتار ەدى.نۇربول الدىباەۆ,
«ەگەمەن قازاقستان». الماتى وبلىسى.