EXPO-2020 Dubai دۇنيەجۇزىلىك كورمەسى شەڭبەرىندە قازاقستاننىڭ ۇلتتىق پاۆيلونىندا Kazakhstan Green Day ىسكەرلىك شارالار سەرياسى ءوتتى, دەپ جازادى Egemen.kz.
Kazakhstan Green Day شەڭبەرىندە وڭىرلىك ەكولوگيالىق سىن-قاتەرلەردى باسقارۋ جۇيەسىنە, ەڭ وزىق قولجەتىمدى تەحنولوگيالاردى (وقت) ەنگىزۋگە, سونداي-اق پارنيكتىك گازداردى باسقارۋعا قاتىستى بىرقاتار ماسەلە تالقىلاندى.
شارا وفلاين جانە ونلاين فورماتتا ءوتتى.
قازاقستان پاۆيلونىنىڭ بيزنەس-لاۋندجىندا سپيكەرلەر مەن دەلەگاتتاردىڭ قاتىسۋىمەن پانەلدىك سەسسيالار ۇيىمداستىرىلدى. ونى دۋبايدىڭ ەلەكترمەن جابدىقتاۋ جانە سۋمەن جابدىقتاۋ باسقارماسىنىڭ (DEWA) باس ديرەكتورى سايد موحاممەد ال تايەر اشتى. سونداي-اق قاتىسۋشىلاردى قر ءباا-دەگى توتەنشە جانە وكىلەتتى ەلشىسى م. مەڭىلبەكوۆ پەن قازاقستاننىڭ ەكولوگيالىق ۇيىمدارى قاۋىمداستىعىنىڭ باسقارما توراعاسى ا. سولوۆەۆا قارسى الدى. سونىمەن قاتار شاراعا حالىقارالىق ساراپشىلار ۆيدەوكونفەرەنتسيا بايلانىسى ارقىلى قوسىلدى.
سپيكەرلەر قاتارىندا نەگىزگى حالىقارالىق جانە ۇلتتىق ساراپشىلار, كەشەندى لاستانۋدىڭ الدىن الۋ جانە وعان قارسى كۇرەس جونىندەگى ەۋروپالىق بيۋرو (European Integrated Pollution Prevention and Control Bureau), رەسەي فەدەراتسياسىنىڭ ەڭ وزىق قولجەتىمدى تەحنولوگيالار بيۋروسى, ەۋروپالىق وداقتىڭ جوباسى – ورتالىق ازيا: سۋ رەسۋرستارى, قورشاعان ورتا جانە كليماتتىڭ وزگەرۋى سالاسىنداعى ىنتىماقتاستىق (WECOOP), ورتالىق ازيانىڭ وڭىرلىك ەكولوگيالىق ورتالىعى (واوەو), Citepa اۋانى لاستاۋ جونىندەگى فرانتسۋز تەحنيكالىق ورتالىعى جانە تاعى باسقا ۇيىمداردىڭ وكىلدەرى بولدى.
ولار «جاسىل كوپىر» سەرىكتەستىك باعدارلاماسى جانە جاسىل تەحنولوگيالار ترانسفەرىنىڭ مەحانيزمى رەتىندە وڭىرلىك ەكولوگيالىق تاۋەكەلدەردى باسقارۋ جۇيەسىن تالقىلادى. سونداي-اق ەۋروپالىق وداق پەن رەسەي فەدەراتسياسىنىڭ وقت ەنگىزۋ بويىنشا تاجىريبەسى ءسوز بولدى. ءۇشىنشى پانەلدىك سەسسيا شەڭبەرىندە قازاقستاننىڭ تومەن كومىرتەكتى دامۋ سالاسىنداعى ساياساتى جانە پارنيكتىك گازداردى باسقارۋ سالاسىنداعى ءىس-قيمىلداردىڭ اشىقتىعى قارالدى.
شارا سوڭىندا قازاقستاننىڭ ءىرى ونەركاسىپتىك كومپانيالارىنىڭ («KEGOC» اق, «سامۇرىق-ەنەرگو» اق, ERG, «قازمۇنايگاز» ۇك» اق, «ارسەلورميتتال تەمىرتاۋ» اق, Kazminerals, Kazakhmys) وكىلدەرىمەن وقت ەنگىزۋ جانە دامىتۋ ماسەلەلەرى قوزعالدى.
قاتىسۋشىلار حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعىنىڭ ونەركاسىپتىڭ نەگىزگى سالالارىندا وقت انىقتامالارىن ازىرلەۋ بويىنشا جۇرگىزىپ جاتقان جۇمىسىن جوعارى باعالادى.
شارا ۇيىمداستىرۋشىسى - «حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى» كەاق.