وپەرا ونەرىنىڭ جاس ۆوكاليستەرى نۇر-سۇلتان قالاسىنا جينالدى. بۇل تۋرالى بيبىگۇل تولەگەنوۆانىڭ حI حالىقارالىق ۆوكاليستەر بايقاۋىنا ارنالعان ءباسپاسوز-ءماسليحاتىندا بەلگىلى بولدى, دەپ جازادى Egemen.kz.
حالىقارالىق بايقاۋعا قاتىسۋعا 11 ەلدەن ءوتىنىم تۇسكەنىمەن, الايدا پاندەمياعا بايلانىستى شەتەلدىك قاتىسۋشىلاردىڭ سانى قىسقارىپ, تەك ءتورت ەلدىڭ وكىلىنە رۇقسات بەرىلگەن.
«الەمدىك پاندەمياعا قاراماستان ۇيىمداستىرۋشىلار بايقاۋدى ۇيىمداستىرعانىنا بارلىق قاتىسۋشى وتە قۋانىشتى. ويتكەنى كوپتەگەن ءىس-شارالار توقتاتىلىپ, قاتىسۋشىلار, جانكۇيەرلەرى, كورەرمەندەر وفلاين شارالاردى, ادەمى وپەرا ونەرىن ساعىندى», دەدى ادىلقازى مۇشەسى, رەسەيدىڭ ەڭبەك سىڭىرگەن ءارتىسى, سانكت-پەتەربۋرگ كونسەرۆاتورياسىنىڭ پروفەسسورى ت.د. نوۆيچەنكو.
ال چەحيادان كەلگەن مەيمان, ادىلقازى مۇشەسى, پراگا وپەراسىنىڭ ءسوليسى, كومي رەسپۋبليكاسىنىڭ حالىق ءارتىسى دامير باسىروۆ: «مۇنداي بايقاۋلار جاڭا ۇرپاققا مادەني-ادامگەرشىلىك تاربيە بەرۋ ءۇشىن اسا قاجەت. ءبىز جاڭا دارىن يەلەرىن انىقتاپ, تانىتۋ ءۇشىن كەلدىك» دەپ, بيبىگۇل تولەگەنوۆاعا بايقاۋدى ۇيىمداستىرعانى ءۇشىن العىس ايتتى.
حالىقارالىق بايقاۋدىڭ اشىلۋ سالتاناتىنا قاتىسقان قر مادەنيەت جانە سپورت ءمينيسترى ا.ر. رايىمقۇلوۆا بايقاۋعا قاتىسۋشىلاردى جانە ۇيىمداستىرۋشىلاردى قۇتتىقتاپ, مەملەكەت باسشىسى قاسىم-جومارت توقاەۆتىڭ حاتىن وقىپ بەردى.
پرەزيدەنت قۇتتىقتاۋ حاتىندا قاتىسۋشىلار مەن ۇيىمداستىرۋشىلاردى قازاقستان رەسپۋبليكاسى تاۋەلسىزدىگىنىڭ 30 جىلدىعىندا وتكىزىلىپ وتىرعان بايقاۋدىڭ اشىلۋ سالتاناتىمەن قۇتتىقتاپ, قازاقتىڭ بۇلب ۇلى بيبىگۇل تولەگەنوۆاعا وسىنشاما جاۋاپتى ميسسياسى ءۇشىن العىس ايتتى.
«ەسىمى الەمگە ايگىلى بيبىگۇل تولەگەنوۆا كلاسسيكالىق ۆوكالدىڭ دامۋىنا زور ۇلەس قوسىپ, ەلىمىزدىڭ اتىن الەمگە پاش ەتتى. بيبىگۇل احمەتقىزىنىڭ ارقاسىندا بايقاۋ جۇيەلى تۇردە ءوتىپ, كوپتەگەن دارىن يەلەرىن تانىتتى. بايقاۋ لاۋرەاتتارىنىڭ ەسىمى الەمگە تانىلىپ, ولار الەم ساحنالارىندا ءان ايتىپ ءجۇر. حالىقارالىق بايقاۋ ارقىلى كوپتەگەن تالانتتى جاس تانىمال بولىپ, ادامزاتتىڭ حالىقارالىق مادەني قورى بايىدى», دەپ اتاپ ءوتتى پرەزيدەنت.
ال نۇر-سۇلتان قالاسى اكىمىنىڭ ورىنباسارى ا.ر. ورالوۆ بايقاۋعا قاتىسۋشىلارعا ساتتىلىك تىلەپ, قالا اكىمى التاي كولگىنوۆتىڭ قۇتتىقتاۋ حاتىن جەتكىزدى.
ايتا كەتەيىك, بايقاۋعا 19-32 جاس ارالىعىنداعى ۆوكاليستەر قاتىسادى. تىڭداۋلار اشىق تۇردە وتەدى. ءان ايتۋ ءتارتىبى جەرەبە تاستاۋ ارقىلى انىقتالىپ, بايقاۋ سوڭىنا دەيىن ساقتالادى. سوڭعى تۋرعا جىبەرىلەتىن قاتىسۋشىلار سانى 14-تەن اسپايدى. 5-8 قازان ارالىعىندا ىرىكتەۋ تۋرى, 10 قازان كۇنى سوڭعى تۋر وتەدى. بايقاۋ جەڭىمپازدارىن ماراپاتتاۋ گالا-كونتسەرتى قازاننىڭ 11-ءى كۇنى «استانا وپەرا» مەملەكەتتىك وپەرا جانە بالەت تەاترىندا وتەدى.
ءحى حالىقارالىق ۆوكاليستەر بايقاۋىنىڭ قازىلار القاسىنىڭ توراعاسى - كسرو مەن قازاقستاننىڭ حالىق ءارتىسى, سوتسياليستىك ەڭبەك ەرى, كسرو مەن قازاقستاننىڭ مەملەكەتتىك سىيلىقتارىنىڭ لاۋرەاتى, اكادەميك بيبىگۇل تولەگەنوۆا.
قازىلار القاسىنىڭ قۇرامىنا وپەرا ونەرىنىڭ شەبەرلەرى كىردى:
1. ۋرمانچەەۆ تيمۋر اكريام ۇلى - قازاقستان رەسپۋبليكاسىنىڭ ەڭبەك سىڭىرگەن قايراتكەرى, ۇلتتىق ونەر ۋنيۆەرسيتەتىنىڭ پروفەسسورى, «قازاقكونتسەرت» مەملەكەتتىك كونتسەرتتىك ۇيىمىنىڭ كوركەمدىك جەتەكشىسى, «استانا وپەرا» حالىقارالىق وپەرا اكادەمياسىنىڭ كوركەمدىك جەتەكشىسى, «قۇرمەت» وردەنىنىڭ يەگەرى. قازاقستان, نۇر-سۇلتان
2. نوۆيچەنكو تامارا دميتريەۆنا - رەسەيدىڭ ەڭبەك سىڭىرگەن ءارتىسى, سانكت-پەتەربۋرگ كونسەرۆاتورياسىنىڭ پروفەسسورى, رەسەي.
3. گۋسەۆ الەكساندر - فورو بوناپارت اتىنداعى مۋزىكا اكادەمياسىنىڭ پروفەسسورى, گ.دونيتسەتتي اتىنداعى اكادەميانىڭ كامەرالىق ءان ايتۋ سەكتسياسىنىڭ مەڭگەرۋشىسى. يتاليا, ميلان.
4. ۋسمانوۆ راميز - ءا.ناۋاي اتىنداعى مەملەكەتتىك اكادەميالىق ۇلكەن تەاتردىڭ ءسوليسى, وزبەكستان رەسپۋبليكاسىنىڭ حالىق ءارتىسى, حالىقارالىق بايقاۋلاردىڭ لاۋرەاتى. وزبەكستان, تاشكەنت.
5. باسىروۆ دامير - پراگا وپەراسىنىڭ ءسوليسى, كومي رەسپۋبليكاسىنىڭ حالىق ءارتىسى, چەحيا.
6. ميلكياۆيچيۋتە يرەنا - ليتۆا كسر حالىق ءارتىسى, مادەنيەت جانە ونەر سالاسىنداعى ليتۆا ۇلتتىق سىيلىعىنىڭ لاۋرەاتى, ليتۆا مۋزىكا جانە تەاتر اكادەمياسىنىڭ پروفەسسورى. ليتۆا, ۆيلنيۋس.
بايقاۋدىڭ باس سەرىكتەسى - «سامۇرىق قازىنا» اق, الەۋمەتتىك سەرىكتەس - «Samruk- Kazyna Trust» كورپوراتيۆتىك قورى.
بايقاۋدى ۇيىمداستىرۋشىلار: قر مادەنيەت جانە سپورت مينيسترلىگى, نۇر-سۇلتان قالاسى اكىمدىگى, «ميراس» قوعامدىق ۇلتتىق مادەني قورى» قوعامدىق قورى.