ورتا سالماقتا كۇش سىناسىپ جۇرگەن قازاقتىڭ تانىمال كاسىپقوي بوكسشىسى جانىبەك ءالىمحان ۇلى ءوزىنىڭ كەلەسى كەزدەسۋىن 5 قاراشادا اقش-تىڭ لاس-ۆەگاس قالاسىندا 37 جاستاعى فرانتسيانىڭ وكىلى حاسسان ن’دام ن’جيكاممەن وتكىزەدى. ال قانداسىمىزدىڭ سول قارسىلاسى جايىندا ءبىز نە بىلەمىز؟
حاسسان 1984 جىلدىڭ 18 اقپانىندا كامەرۋننىڭ استاناسى – ياۋندەدە دۇنيەگە كەلدى. اۋەلى اۋەسقويلار اراسىندا ونەر كورسەتىپ, 2013 جىلى افريكا چەمپيونى اتانىپ, افريكا ويىندارىندا كۇمىس مەدالدى يەلەندى. 2004 جىلى افينا وليمپياداسىنىڭ شيرەك فينالىنا دەيىن جەتتى. بۇل مەجەدە ول رەسەيلىك گايداربەك گايداربەكوۆكە ەسە جىبەردى. ەجەلگى ەللادا ەلىندەگى ۇلى دۇرمەك اياقتالعان سوڭ ن’جيكام كاسىپقويلار اراسىندا باق سىناۋعا بەل بۋدى. ءوزىنىڭ كوزدەگەن ماقساتىنا قول جەتكىزۋ ءۇشىن فرانتسياعا قونىس اۋدارىپ, سول ەلدىڭ ازاماتتىعىن الدى.
حاسسان ن’دام ن’جيكامنىڭ كاسىپقوي رينگتە جۇدىرىقاسىپ جۇرگەنىنە 16 جىلعا جۋىقتادى. سول ۋاقىت ارالىعىندا ول 42 جەكپە-جەك وتكىزىپ, 37-سىندە جەڭىسكە جەتتى. 21 قارسىلاسىن نوكاۋتقا جىبەردى. ايتۋلى بوكسشى كەزىندە اۆتانديل حۋرتسيدزە, ماكس بۋرساك, پيتەر كۋيللين, الفونسو بلانكو, رەتو مۋراتا, مارتين ميۋررەي جانە تاعى باسقا ساڭلاقتاردى سان سوقتىردى. 2012 جىلى حاسان WBO جانە 2017 جىلى WBA نۇسقالارى بويىنشا الەم چەمپيونى اتاندى. تاعى باسقا بەلدى تۇجىرىمداردىڭ التىن بەلبەۋىن يەلەندى. ءوزىنىڭ سپورتتىق كارەراسىندا فرانتسۋز جىگىتى تەك پيتەر كۋيللين (2012 جىلى, تورەشىلەر شەشىمىمەن), داۆيد لەمە (2015, تورەشىلەر شەشىمىمەن), رەتو مۋراتا (2017, 7 راۋندتا باسەكەنى جالعاستىرۋدان باس تارتتى), كاللۋم سميت (2019, 3 راۋندتا نوكاۋت) جانە فەدور چۋدينوۆقا (2019, تورەشىلەر شەشىمىمەن) عانا ەسە جىبەردى.
كاسىپقويلاردىڭ وليمپياداعا قاتىسۋىنا رۇقسات بەرىلگەننەن كەيىن ن’جيكام 2016 جىلى ريو-دە-جانەيروداعى جارىستا بوي كورسەتتى. بىراق ول الىسقا شاپپادى. كامەرۋن قۇراماسىنىڭ ساپىندا 81 كگ سالماق دارەجەسىندە سايىسقا تۇسكەن حاسان برازيليالىق ميشەل دي سوۋزا بورجيسكە جول بەردى.
فرانتسيا وكىلىنىڭ اتاق-داڭقى زور بولعانىمەن, قازىرگى كەزدە ول بۇرىنعىداي بابىندا ەمەس. سوڭعى ەكى باسەكەسىندە ن’جيكامنىڭ جەڭىلىس تابۋى وسى ءسوزىمىزدىڭ ايقىن دالەلى. ونىڭ ۇستىنە, ول ەكى جىلدان بەرى شارشى الاڭعا شىققان جوق. ءيا, جانىبەك ءالىمحان ۇلىنا بۇرىنعى چەمپيونعا قارسى بولسا دا, جەكپە-جەككە شىعۋ ءتيىمدى. قانشا دەگەنمەن حاساننىڭ اتاعى بار. بىراق, شىنى كەرەك, شاۋ تارتىپ قالعان بوكسشى قازاقتىڭ جالىنداپ تۇرعان جىگىتىن جەڭە الادى دەگەنگە سەنۋ قيىن.