ليتۆادا ءوتىپ جاتقان الەم چەمپيوناتىنىڭ جارتىلاي فينالىندا قازاقستاننىڭ ۇلتتىق قۇراماسى پورتۋگاليامەن كۇش سىناستى. 2000 جىلى دۇنيەجۇزىلىك دوپ دوداسىندا قولا مەدالدى يەلەنىپ, 2018 جىلى ەۋروپا بىرىنشىلىگىندە قارسىلاس شاق كەلتىرمەگەن ايتۋلى كوماندا بالتىق جاعالاۋىندا جالاۋى جەلبىرگەن جارىسقا دا وتە كەرەمەت بابىندا كەلگەن ەكەن. قازاقستان دا قارا جاياۋ ەمەس ەكەنىن ايعاقتادى.
نەگىزى كەزدەسۋدىڭ باستالعانىنا ءتورت مينۋتتاي وتكەندە داۋرەن تۇرساعۇلوۆ پەن شىڭعىس ەسەنامانوۆ ۇيىمداستىرعان تاماشا شابۋىلدىڭ ارقاسىندا ءبىرجان ورازوۆ گول سوققان بولاتىن. بىراق سونىڭ الدىندا دوپ سىرتقا شىعىپ كەتكەندىكتەن, تورەشى ونى ەسەپتەمەدى. سودان كەيىن پوزيتسيا ءۇشىن تارتىس باستالدى. قوس كوماندا دا بارىن سالىپ, ايقاس الاڭىندا وزدەرىنىڭ باسىمدىعىن دالەلدەۋگە تىرىستى. ەكى جاقتىڭ ويىنشىلارى ءجيى-ءجيى العا ۇمتىلىپ, قاۋىپتى شابۋىلدار ۇيىمداستىرعانىمەن, قورعانىستا دا وتە ساق ويناۋعا تىرىستى. ويتكەنى وسىنداي اسا شيەلەنىستى باسەكەدە ءبىر گولدىڭ ءوزى بارلىق ماسەلەنى شەشۋى مۇمكىن ەدى.
ءبىرىنشى كەزەڭدە ەرەكشە ەستە قالعان جايتتار كوپ بولدى. ماسەلەن, تايناننىڭ قۇلاپ بارا جاتىپ, قايشىلاپ تەپكەن دوبى ماڭدايشاعا ءتيدى. بۇرىشتامادان بەرىلگەن دوپتى ورازوۆ قاقپاعا قاراي باعىتتاعان ەدى, الايدا ول باعاناعا بارىپ سوعىلدى. سول سەكىلدى پورتۋگاليا فۋتزالشىلارىنىڭ دا تابلوداعى ەسەپتى وزگەرتۋگە بىرنەشە مۇمكىندىگى بولدى. بىراق يگيتانىڭ ەپتىلىگىنىڭ ارقاسىندا قاقپامىز امان قالدى.
ۇزىلىستەن كەيىن ويىن قايتا جانداندى. 23-مينۋتتا انيلتون سەزار پاني پورتۋگاليالىقتاردى العا شىعاردى – 1:0. تارازى باسىن تەڭەستەرۋ ءۇشىن جەرلەستەرىمىزگە كوپ تەر توگۋگە تۋرا كەلدى. تەك نەگىزگى ۋاقىتتىڭ اياقتالۋىنا ساناۋلى سەكۋندتار عانا قالعاندا كاكا قاقپاشى يگيتانىڭ ورنىنا داۋرەن نۇرعوجيندى بەسىنشى ويىنشى رەتىندە الاڭعا شىعاردى. باس باپكەردىڭ بۇل تاكتيكاسى ءوز جەمىسىن بەردى, ويىن اياقتالۋعا ساناۋلى سەكۋند قالعاندا داۋرەن تەپكەن دوپ توردا تۋلادى – 1:1.
ويىن ەكسترا-تايمعا ۇلىسىپ, ەكىنشى مينۋتتا جۋنيور دۋگلاس ايىپ دوبىن وتە كەرەمەت ورىندادى – 1:2. دوپتى كوزبەن شىعارىپ سالعان قاقپاشىنىڭ باسىن شايقاعاننان باسقا امالى قالمادى. بىراق بۇل باسىمدىقتى ءبىز ۇستاپ تۇرا المادىق. قوسىمشا ۋاقىت اياقتالار تۇستا برۋنۋ كوەليۋ ەسەپتى تەڭەستىرىپ كەتتى – 2:2. ال پەنالتي سوعۋ بارىسىندا پيرەنەي تۇبەگى تۇلەكتەرىنىڭ باعى جاندى. قورىتىندى ەسەپ 2:2 (4:3). بۇل جەڭىستىڭ پورتۋگاليا فۋتزالشىلارىنا وڭاي كەلمەگەنى سونشالىق, ولاردىڭ كەيبىر ويىنشىلارى قۋانىشتان كوزدەرىنە ەرىك بەردى. ال ءبىزدىڭ قازاقستان قۇراماسىن دا جەڭىلدى دەپ ايتۋعا اۋىز بارمايتىنداي كۇي كەشكەنىمىز تاعى راس.
جەكسەنبىدەن دۇيسەنبىگە قاراعان ءتۇنى جەرلەستەرىمىز برازيليا قۇراماسىمەن قولا مەدال ءۇشىن سايىسقا ءتۇستى. ال باس جۇلدە ءۇشىن تارتىس ارگەنتينا مەن پورتۋگاليا فۋتزالشىلارى اراسىندا ءوربىدى. بۇل باسەكەلەردىڭ قالاي وتكەنى جايىندا گازەتىمىزدىڭ ەرتەڭگى سانىندا ەگجەي-تەگجەيلى باياندايتىن بولامىز.