رەسەي فەدەراتسياسىنىڭ دەنساۋلىق ساقتاۋ ءمينيسترى ميحايل مۋراشكو دۇنيەجۇزىلىك دەنساۋلىق ساقتاۋ ۇيىمىندا رەسەيلىك «سپۋتنيك V» ۆاكتسيناسىن تىركەۋگە كەدەرگى بولعان بارلىق كەدەرگىلەر جويىلعانىن مالىمدەدى, دەپ حابارلايدى Egemen.kz.
بۇل تۋرالى رەسەيلىك شەنەۋنىك تاسس اگەنتتىگىنىڭ سۇراعىنا بەرگەن جاۋابىندا ايتتى. دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادانوم گەبرەيۋسپەن كەزدەسۋى قالاي وتكەنىن بايانداعان رەسەيلىك مينيستر «سپۋتنيك V»-ءدى حالىقارالىق دەڭگەيدە تىركەۋ مۇمكىندىكتەرى تۋرالى ايتادى.
«رەسەي فەدەراتسياسىنىڭ رەسەيلىك «سپۋتنيك V» ۆاكتسيناسىن ىلگەرىلەتۋ جانە تىركەۋ تۋرالى ۇستانىمى تىڭدالدى. ءبىز بۇگىندە ماسەلەلەردىڭ ءبارىن تولىعىمەن جويدىق. ءوتىنىش بەرۋشى – دۇنيەجۇزىلىك دەنساۋلىق ساقتاۋ ۇيىمىنىڭ الاڭىندا «سپۋتنيك V» ۆاكتسيناسىن تىركەۋمەن اينالىساتىن كومپانيا بىرقاتار قۇجاتتارعا قول قويىپ, بىرقاتار قوسىمشا قۇجاتتاردى ۇسىنۋى كەرەك. بۇل اكىمشىلىك ءراسىم جانە بۇل قاراستىرىلادى», دەگەن رەسەيدىڭ دەنساۋلىق ساقتاۋ ءمينيسترى «سپۋتنيك V» ۆاكتسيناسىن تىركەۋ بويىنشا ەندى ەشبىر كەدەرگى قالماعانىن ايتتى.
«بۇگىنگى تاڭدا بارلىق كەدەرگىلەر جويىلدى. سوندىقتان ءبىز بۇگىن ودان ءارى جۇمىس ىستەۋگە ەشقانداي كەدەرگى كورىپ وتىرعان جوقپىز. مۇنى بىزگە دۇنيەجۇىزىلىك دەنساۋلىق ساقتاۋ ۇيىمىنىڭ باس ديرەكتورى راستادى», دەدى ول.
تاسس اگەنتتىگىنىڭ جازۋىنشا, گەبرەيەسۋس رەسەي Twitter-دەگى جازباسىندا اتالمىش كەزدەسۋ تارلى پىكىر ءبىلدىرىپ, ونىڭ بارىسىندا دۇنيەجۇزىلىك دەنساۋلىق ساقتاۋ ۇيىمى شۇعىل قولدانۋعا ۇسىنعان ءدارى-دارمەكتەر تىزىمىنە كوروناۆيرۋسقا قارسى ۆاكتسينالاردى ەنگىزۋ پروتسەدۋراسى تالقىلانعانىن اتاپ ءوتتى.
ەسكە سالساق, «سپۋتنيك V» ۆاكتسيناسى قازاقستان ازاماتتارى ەڭ كوپ قابىلداعان ۆاكتسينا بولىپ سانالادى. قاراعاندى قالاسىندا رەسەيلىك ۆاكينانى جاسايتىن زاۋىت تا جۇمىس ىستەپ تۇر.