جاڭا وقۋ جىلى باستالعاننان بەرى باتىس قازاقستان وبلىسىندا 498 وقۋشى كوروناۆيرۋس جۇقتىرعانى انىقتالدى, دەپ حابارلايدى Egemen.kz.
بقو سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى مۇحامعالي ارىسپاەۆ ءمالىم ەتكەنىندەي, ۆيرۋس جۇقتىرۋدىڭ 74 دەرەگى وقۋ پروتسەسىنىڭ باستالۋىنا بايلانىستى ەمەس. ونىڭ سوزىنە قاراعاندا, 151 بالا ىندەتتى ءوز وتباسىندا بۇرىن اۋىرعان جاقىندارىنان جۇقتىرعان.
جىل باسىنان بەرى 252 بالا ستاتسيونارلاردا ەمدەلگەن. قازىر ستاتسيونارلاردا 6 ءجاسوسپىرىم ەم قابىلداپ جاتىر. سونداي-اق قىركۇيەك ايىندا 84 پەداگوگتىڭ دەرتكە شالدىققانى تىركەلدى.
«كۇنى بۇگىن 27 مەكتەپتە 36 سىنىپتىڭ وقۋشىلارى مەن مۇعالىمدەرىن جانە 8 بالاباقشادا 8 توپتى ءۇي كارانتينىنە كوشىرۋ تۋرالى 32 قاۋلى شىعارىلدى. مەكتەپتەر مەن باسقا دا وقۋ ورىندارىندا ۇستازدار, شاكىرتتەر, ستۋدەنتتەر مەن قىزمەتكەرلەر اراسىندا كۇن سايىن مونيتورينگ جۇرگىزىلۋدە», دەدى مۇحامعالي ارىسپاەۆ .
دەپارتامەنت باسشىسىنىڭ ايتۋىنشا, قىركۇيەك ايىندا 2469 ادامنان ىندەت تابىلسا, سونىڭ 1969-ى – ۆاكتسينا الماعاندار. جىل باسىنان بەرى 28 251 ناۋقاس تىركەلدى. سوڭعى اپتادا (24-30 قىركۇيەك) الدىڭعىمەن سالىستىرعاندا, كوروناۆيرۋس جۇقتىرۋ دەڭگەيى 23,5 پايىزعا (526-دان 402-گە) تومەندەدى.
ارىسپاەۆ ءوڭىر سارى ايماقتا بولعانىمەن, جاعدايدىڭ ءالى دە كۇردەلى ەكەندىگىن جەتكىزدى. ۆاكتسيناتسيالاۋ قارقىنى تومەن, وسىعان بايلانىستى تۇرعىنداردى ءوز دەنساۋلىعىنا ەنجار قاراماي, ەكپە الۋعا شاقىردى.