ەلىمىزدە 45 مىڭنان استام قارتقا مەملەكەت تاراپىنان ارناۋلى الەۋمەتتىك قىزمەت كورسەتىلدى, دەپ حابارلايدى Egemen.kz قر ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
مينيسترلىك حابارلاعانداي, بۇگىنگى تاڭدا 45 مىڭنان استام قارت ااق-مەن (ارناۋلى الەۋمەتتىك قىزمەت) قامتىلعان. قارتتارعا ارنالعان قىزمەتتەر قاتارىندا 45 ستاتسيونارلىق ۇلگىدەگى ۇيىمدا (مەديتسينالىق-الەۋمەتتىك مەكەمەلەر) جانە 43 جارتىلاي ستاتسيوناردا (كۇندىز بولۋ بولىمشەلەرى جانە وڭالتۋ ورتالىقتارى) ەم الۋ جاتادى.
سونداي-اق, ەلىمىز بويىنشا 357 الەۋمەتتىك كومەك كورسەتۋ بولىمشەسى مەن مەملەكەتتىك الەۋمەتتىك تاپسىرىس اياسىندا 136 ۇكىمەتتىك ەمەس ۇيىم قازاقستاندىق اتا-اجەلەردى ءوز قامقورلىعىنا العان.
«الەۋمەتتىك قىزمەت كورسەتۋ مەكەمەلەرى 8 قىزمەت ءتۇرىن ۇسىنادى. اتاپ ايتقاندا, الەۋمەتتىك-ەكونوميكالىق, الەۋمەتتىك-قۇقىقتىق, الەۋمەتتىك-ەڭبەك, الەۋمەتتىك-مادەني, الەۋمەتتىك-پسيحولوگيالىق, الەۋمەتتىك-پەداگوگيكالىق جانە الەۋمەتتىك-مەديتسينالىق قىزمەت ءتۇرى بار. الەۋمەتتىك قىزمەتكەرلەر اپتاسىنا كەمىندە 2 رەت كومەك الاتىن قارتتاردىڭ ۇيىنە بارىپ تۇرادى. ءبىزدىڭ ماماندار ەگدە جاستاعى ازاماتتاردىڭ جاعدايىن ءبىلىپ, ولارعا قول ۇشىن سوزادى. سونىمەن قاتار ۇكىمەت تاراپىنان كورسەتىلەتىن كومەكتەردى ۇسىنىپ, قىزمەت كورسەتەدى», دەپ ءتۇسىندىردى الەۋمەتتىك كومەك ساياساتىن دامىتۋ دەپارتامەنتىنىڭ ديرەكتورى اسقار نيازوۆ.