قر ادىلەت ءمينيسترى مارات بەكەتاەۆ بەلگياعا جۇمىس ساپارى بارىسىندا ەۋروپالىق وداق پەن بەلگيانىڭ رەسمي تۇلعالارىمەن قر-داعى قۇقىقتىق رەفورمالار جانە قۇقىقتىق قولداۋ ماسەلەلەرى بويىنشا كەزدەسۋلەر وتكىزدى, دەپ حابارلايدى Egemen.kz.
قازاقستاننىڭ بەلگياداعى ەلشىلىگى حابارلاعانداي, 29 قىركۇيەكتە م.بەكەتاەۆ ەۋروپالىق وداقتىڭ ادام قۇقىقتارى جونىندەگى ارنايى وكىلى يمون گيلمورمەن جانە ەۋروپالىق سىرتقى ءىس-قيمىل قىزمەتىنىڭ وكىلدەرىمەن كەلىسسوزدەر جۇرگىزدى.
اڭگىمەلەسۋ بارىسىندا تاراپتار سوت تورەلىگى جونىندەگى كىشى كوميتەت پەن «قازاقستان – ەۋروپالىق وداق» ادام قۇقىقتارى جونىندەگى ديالوگ جەلىسى بويىنشا ەكىجاقتى ءوزارا ءىس-قيمىلدىڭ وزەكتى ماسەلەلەرىن تالقىلادى. ي. گيلمور ادام قۇقىقتارى ولشەمىندەگى ەكىجاقتى بايلانىستاردىڭ ءوسۋ ديناميكاسىنا, ونىڭ ىشىندە 2021 جىلعى 6 قازانىندا الماتى قالاسىندا وتەتىن «ورتالىق ازيا - ەۋروپالىق وداق» ازاماتتىق فورۋمى باستاماسىنا جوعارى باعا بەردى, وعان ەو ارنايى وكىلى قاتىسۋدى جوسپارلاپ وتىر. م.بەكەتاەۆ ادىلەت مينيسترلىگىنىڭ مەملەكەت باسشىسى باستاماشىلىق ەتكەن ساياسي جاڭعىرتۋ مەن ادام قۇقىقتارىن قورعاۋدىڭ قۇقىقتىق بلوگى بولىگىندەگى قىزمەتى تۋرالى ايتىپ بەردى.
قر ءام باسشىسى ەۋروپالىق پارلامەنت دەپۋتاتتارىمەن, ونىڭ ىشىندە ادام قۇقىقتارى جونىندەگى كىشى كوميتەت توراعاسىنىڭ ءبىرىنشى ورىنباسارى بەرنار گەتتامەن, سىرتقى ىستەر كوميتەتى توراعاسىنىڭ ورىنباسارى ۋرماس پاەتپەن, ورتالىق ازيامەن ءوزارا ءىس-قيمىل جونىندەگى دەلەگاتسيا توراعاسىنىڭ ورىنباسارى اندريس امەريكسپەن, ىشكى نارىق جانە تۇتىنۋشىلاردىڭ قۇقىقتارىن قورعاۋ كوميتەتى توراعاسىنىڭ ورىنباسارى روزا تۋنمەن, پەتيتسيالار جونىندەگى كوميتەت توراعاسىنىڭ ورىنباسارى تاتيانا جدانوكامەن, «قازاقستان-ەو» پارلامەنتتىك دەلەگاتسياسىنىڭ مۇشەسى تەرري ماريانيمەن كەزدەستى.
كەزدەسۋلەر بارىسىندا ەلىمىزدىڭ ساياسي جۇيەسىن جاڭعىرتۋعا جانە دەموكراتيالىق ينستيتۋتتاردى نىعايتۋعا باعىتتالعان قازاقستانداعى رەفورمالار بويىنشا پىكىر الماستى.