حالىقارالىق بوكس قاۋىمداستىعى (AIBA) ءوز قاتارىنداعى ۇزدىكتەردى ماراپاتتاۋ ءداستۇرىن جالعاستىرۋدا. وسىعان بايلانىستى, ءاربىر ۇلتتىق فەدەراتسيا ءوزىنىڭ نەگىزگى ماماندارىن بوكستىڭ دامۋىنا, نىعايۋىنا قوسقان ۇلەسى مەن جەتىستىكتەرىنە قاراي تاڭداپ, ساراپتايدى, دەپ حابارلايدى Egemen.kz.
ماسەلەن, قبف پىكىرى بويىنشا قازاقستانداعى ەڭ ۇزدىك باپكەر قايرات ساتجانوۆ بولدى. ونىڭ جاستار قۇراماسىنداعى جۇمىسى بارىسىندا جوعارى سپورتتىق ناتيجەلەر, جاقسى بوكس تاجىريبەسىن ەنگىزۋ جانە ت.ب. كورسەتىلدى. توكيو-2020 وليمپياداسىنىڭ قولا جۇلدەگەرى قامشىبەك قوڭقاباەۆ ۇزدىك بوكسشى اتاندى. ۇلتتىق قۇرامانىڭ كاپيتانى وسكەلەڭ ۇرپاققا ۇلگى جانە رينگتەگى ناتيجەلەردەن باسقا قوعامدىق جۇمىستارعا دا قاتىسادى.
ايەلدەر اراسىندا ۇزدىك بوكسشى اتاعىنا كوماندا كوشباسشىسى الۋا بالقىبەكوۆا لايىق دەپ تانىلدى. ول بيىلعى جىلى ەڭ جەڭىل سالماقتا دۋباي-2021 ازيا چەمپيوناتىن جەڭىپ الدى.
جاستار اراسىنداعى الەم جانە ازيا چەمپيونى سانجار تاشكەنباي دا AIBA سەرتيفيكاتىنا يە بولدى. وسىنداي ماراپات ونىڭ قۇراماداعى ارىپتەسى ميلانا ايۋپوۆاعا دا بەرىلدى. بيىل ول قۇرلىقتىق جاستار اراسىنداعى بىرىنشىلىكتە جەڭىمپاز اتاندى.
سونداي-اق ەرمەك سۇيەنىش قازاقستاننىڭ ۇزدىك تورەشىسى اتاندى. ءبىزدىڭ مامان توكيوداعى وليمپيادا ويىندارىندا جوعارى دەڭگەيدە جۇمىس ىستەگەنى بەلگىلى. ماراپاتتاۋ ءراسىمى ونلاين فورماتتا ءوتتى. ونى قازاقستان بوكس فەدەراتسياسىنىڭ اتقارۋشى ديرەكتورى ماراتبەك مىقتىبەكوۆ جۇرگىزدى.
ءىس-شارانىڭ ءوزى بۇكىل الەمدەگى حالىقارالىق بوكس كۇنىنە ورايلاستىرىلعان.