دەنساۋلىق ساقتاۋ ءمينيسترى الەكسەي تسوي كوروناۆيرۋسقا قارسى ۆاكتسينانى قايتا ەگۋ جوسپارى تۋرالى ايتتى, دەپ حابارلايدى Egemen.kz.
«قازىرگى كەزدە بارلىق مەملەكەت ءۇشىن رەۆاكتسيناتسيا ماسەلەسى وزەكتى بولىپ تۇر. قازاقستاندا ارنايى جۇمىس توبى قۇرىلدى. ونىڭ قۇرامىنا جەتەكشى كلينيتسيست-عالىمدار, دارىگەرلەر مەن سانيتارلىق-ەپيدەميولوگيالىق قىزمەت ماماندارى ەندى. ءبىز دۇنيەجۇزىلىك دەنساۋلىق ساقتاۋ ۇيىمنان جانە حالىقارالىق اگەنتتىكتەردەن قاجەتتى اقپاراتتى الدىق. قازىرگى كەزدە بارلىق تاجىريبە جان-جاقتى زەردەلەنىپ جاتىر. بۇگىندە ناقتى تالاپ جوق. ويتكەنى COVID-19 – جاڭادان شىققان ۆيرۋس», دەدى تسوي ۇكىمەتتىڭ ءباسپاسوز قىزمەتىندە وتكەن ونلاين بريفينگتە.
ءمينيستردىڭ ايتۋىنشا, بارلىق اقپارات زەردەلەنگەننەن كەيىن حالىقتى يممۋنداۋ جونىندەگى كوميسسيا ءتيىستى شەشىم شىعارادى.
«جاقىن ارادا ساراپشىلار توبى ءوز قورىتىندىسىن شىعارادى. جالپى, وتاندىق مەديتسينا سالاسى دايىن. شەشىم شىعارىلعاننان كەيىن تولىققاندى جۇمىس ىستەي الامىز», دەپ اتاپ كورسەتتى تسوي.
ايتا كەتەرى, تامىزدىڭ باسىندا دەنساۋلىق ساقتاۋ ءمينيسترى ۆاكتسينانى قايتا سالدىرۋ مەرزىمى تۋرالى ايتقان بولاتىن. ونىڭ سوزىنە قاراعاندا, قازاقستاندا حالىقتىڭ باسىم بولىگى ماۋسىم-شىلدە ايلارىندا ەكپە سالدىردى. سول سەبەپتى ازىرشە انتيدەنەلەردىڭ دەڭگەيى ءالى جوعارى بولىپ تۇر. ال رەۆاكتسينالاۋدى 9 ايدان كەيىن جاساۋعا بولادى. دەگەنمەن ەكپەنى اقپان ايىندا سالعان ادامدار دا بار.
«ماسەلەن اقپان ايىندا العاشقى بولىپ ۆاكتسينا سالدىرعان ادامدارعا قازان ايىنا قاراي ەكپەنى قايتا سالۋ قاجەت. ونىڭ ۋاقىتى شامامەن 1 قازان», دەدى تسوي وتىرىستاردىڭ بىرىندە.
قازاقستان رەۆاكتسينالاۋ ءتارتىبىن پىسىقتاپ العاننان كەيىن دۇنيەجۇزىلىك دەنساۋلىق ساقتاۋ ۇيىمىمەن كونسۋلتاتسيا جۇرگىزەدى. سودان كەيىن عانا ۆاكتسينانى قايتا سالۋ شارالارى باستالادى.