قاراعاندىدا ەكولوگيا دەپارتامەنتىنىڭ قىزمەتكەرىنە قاتىستى سوت ۇكىمى شىقتى. سوت ونى الاياقتىق ارەكەتى بويىنشا ءۇش جىلعا باس بوستاندىعىنان ايىردى, دەپ حابارلايدى Egemen.kz.
قاراعاندى قالاسىنىڭ قازىبەك بي اۋداندىق سوتى «قاراعاندى وبلىسى بويىنشا ەكولوگيا دەپارتامەنتى» رمم باس مامانىنا قاتىستى الاياقتىققا ارەكەت ءىسى بويىنشا ۇكىمىن جاريالادى.
سوتقا دەيىنگى تەرگەپ-تەكسەرۋ ورگاندارى دەپارتامەنت قىزمەتكەرىنە قك-ءنىڭ 24-بابىنىڭ 3-بولىگى-190-بابىنىڭ 3-بولىگى-1, 2-تارماقتارى بويىنشا الاياقتىق جاسادى, ياعني مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادام ءوزىنىڭ قىزمەت بابىن پايدالانا وتىرىپ ادامدار توبىنىڭ الدىن الا ءسوز بايلاسۋى بويىنشا ءىرى مولشەردە الداۋ جولىمەن بوتەننىڭ مۇلكىن ۇرلادى دەگەن ايىپ تاقتى.
تەكسەرۋ ناتيجەسىندە ەكولوگيا دەپارتامەنتىنىڭ وكىلى ءبىر كاسىپورىنعا تەكسەرۋ جۇرگىزىپ, وندا قورشاعان ورتاعا زيان كەلتىرگەن ەكولوگيالىق زاڭناما تالاپتارىنىڭ بۇزىلعانىن انىقتاعانى بەلگىلى بولدى. سودان كەيىن ەكولوگ وسى جشس تەحنيكالىق ديرەكتورىمەن بىرلەسىپ, بۇل جاعدايدا قالاي پايدا تابۋعا بولاتىنىن جوسپارلاعان.
وسىلايشا, دەپارتامەنت قىزمەتكەرى قورىتىندىدا سەرىكتەستىكتىڭ ەكولوگياعا كەلتىرگەن زالالىنىڭ ەڭ جوعارى سوماسىن كورسەتۋگە, ال كەيىننەن 10 ملن تەڭگە مولشەرىندە سىياقى بەرسە, زالال سوماسىن ازايتۋعا بولادى دەپ كورسەتۋى ءتيىس بولدى. وسىنداي وتىنىشپەن تەحنيكالىق ديرەكتور كومپانيانىڭ قۇرىلتايشىلارىنا بارادى.
الايدا جشس باسشىلىعى پارا بەرۋدەن باس تارتىپ, قۇقىق قورعاۋ ورگاندارىنا حابار بەرەدى. ناتيجەسىندە, ەكولوگيا دەپارتامەنتىنىڭ باس مامانى جانە جشس تەحنيكالىق ديرەكتورى اقشا الۋ بارىسىندا قىلمىس ۇستىندە ۇستالدى. سوتتالۋشىنىڭ كىناسى كۋاگەرلەردىڭ ايعاقتارىمەن, جاسىرىن تەرگەۋ ارەكەتتەرىنىڭ ماتەريالدارىمەن, سونداي-اق مويىنداۋ ايعاقتارىمەن دالەلدەندى. بۇل جاعدايدا پروكۋرور ايىپتالۋشىنى 4 جىلعا باس بوستاندىعىنان ايىرۋدى سۇرادى. ال قورعاۋشى تاراپ جۇمساق ۇكىم شىعارۋدى ءوتىندى.
ايتا كەتۋ كەرەك, قىلمىستىق كودەكسكە سايكەس, مۇنداي قىلمىس ءۇشىن 7 جىلعا دەيىن باس بوستاندىعىنان ايىرۋ جازاسى قاراستىرىلعان. جازانى تاڭداۋ كەزىندە سوت ايپتالۋشىنىڭ شىن جۇرەكتەن كىناسىن مويىنداعانىن جانە ءوزى جالعىز كامەلەتكە تولماعان بالا تاربيەلەپ وتىرعانىن ەسكەرىپ, بۇل جايتتاردى كىنانى جەڭىلدەتەتىن ءمان-جاي دەپ قاراستىردى.
الايدا كىنانى اۋىرلاتاتىن ءمان-جاي دا جوق ەمەس – ول قىزمەتكەردىڭ قابىلدانعان انتىن بۇزۋى.
«سوت ۇكىمىمەن ك. ۇكىمدى ورىنداۋ مەرزىمىن 5 (بەس) جىلعا دەيىن ۇزارتا وتىرىپ, بىراق بالا ون ءتورت جاسقا تولعانعا دەيىن 3 جىلعا باس بوستاندىعىنان ايىرىلادى. سونداي-اق سوتتالعان ادام ءومىر بويى مەملەكەتتىك قىزمەتتە جۇمىس ىستەۋ قۇقىعىنان ايىرىلدى. ج-عا قاتىستى (جشس تەحنيكالىق ديرەكتورى) قايتىس بولۋىنا بايلانىستى ءىس توقتاتىلدى», دەپ حابارلادى قاراعاندى قالاسى قازىبەك بي اۋداندىق سوتىنىڭ ءباسپاسوز قىزمەتى.
سوت ۇكىمى زاڭدى كۇشىنە ەنگەن جوق.