ءورت 26 قىركۇيەكتە قوستانايدىڭ ۋزكوكولەينايا كوشەسىندەگى يندۋستريالدى ايماقتا بولعان. قوستاناي وبلىسى توتەنشە جاعدايلار دەپارتامەنتى ءباسپاسوز قىزمەتىنىڭ حابارلاۋىنشا, ديىرمەن ورتەنىپ كەتتى, دەپ جازادى Egemen.kz.
ءورت سوندىرۋشىلەرگە حابار ساعات 15.07-دە تۇسكەن. ماماندار وقيعا ورنىنا جەتكەنشە ءورتتىڭ اۋماعى شامامەن 200 شارشى مەترت جەردى شارپىپ ۇلگەرگەن.
عيماراتتىڭ شاتىرى تولىعىمەن جانىپ كەتكەن. قاتتى جەلدىڭ اسەرىنەن جالىن توبەگە تەز تاراپ, كەيىن قويماعا ىرگەلەس ورنالاسقان اۋماقتى دا جالىن شارپىدى.
ءورتتى سوندىرۋگە ءورت ءسوندىرۋ جانە اۆاريالىق-قۇتقارۋ قىزمەتىنىڭ 57 قىزمەتكەرى مەن 11 ارنايى تەحنيكا جۇمىلدىرىلدى. ءورتتى سوندىرۋگە «قوستاناي سۋ» مكك, «رەزەرۆ» رمك مەن «قازاقستان تەمىر جولى» اق كۇشتەرى مەن قۇرالدارى اتسالىستى.
ماماندار ساعات 16:51-دە ءورتتىڭ بەتىن قايتاردى. ال ونى تۇبەگەيلى ءسوندىرۋ ءۇشىن قوسىمشا ءبىر ساعات قىرىق مينۋت ۋاقىت كەتكەن. زارداپ شەككەندەر جوق. ءورتتىڭ سەبەبى انىقتالۋدا.