سەنات توراعاسى ماۋلەن اشىمباەۆ بۇگىن قازاقستانعا رەسمي ساپارمەن كەلگەن تاجىكستان رەسپۋبليكاسى ولي ءماجليسى ميللي ءماجليسىنىڭ توراعاسى رۋستامي ەموماليمەن كەزدەستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
ماۋلەن اشىمباەۆ ءوز سوزىندە قازاقستان مەن تاجىكستان اراسىنداعى بەرىك بايلانىستار ءبىزدىڭ حالىقتارىمىز اراسىنداعى كوپعاسىرلىق دوستىق پەن باۋىرلاستىق بايلانىستارىنا نەگىزدەلگەنىن, ال ەكى مەملەكەت سەنىمدى ستراتەگيالىق ارىپتەستەر مەن وداقتاستار بولىپ تابىلاتىنىن اتاپ ءوتتى.
سەنات توراعاسى بيىل قازاقستان پرەزيدەنتى تاجىكستاندا ەكى رەت بولعانىن اتاپ ءوتتى. مۇنداي ساپارلاردىڭ جيىلىگى جانە وسى كەزدەسۋلەر بارىسىندا قول جەتكەن ۋاعدالاستىقتاردىڭ دەڭگەيى ەكى مەملەكەت باسشىلارى ورناتقان ىنتىماقتاستىقتىڭ جوعارى دەڭگەيىن كورسەتەدى.
«قازاقستان پرەزيدەنتى قاسىم-جومارت توقاەۆتىڭ بيىلعى مامىردا تاجىكستانعا جاساعان رەسمي ساپارى اياسىندا ءوزارا قارىم-قاتىناستارىمىزدى ودان ءارى نىعايتۋدىڭ كەلەشەگى ايقىندالدى. ەكى ەل پرەزيدەنتتەرىنىڭ بىرلەسكەن مالىمدەمەسىندە ستراتەگيالىق ارىپتەستىك قاتىناستارىن دامىتۋعا نىق ۇستانىمدارىن ءبىلدىردى. ەكى ەل پرەزيدەنتتەرى ورناتقان ىنتىماقتاستىقتىڭ جوعارى دەڭگەيىن قازاقستان مەن تاجىكستان پارلامەنتتەرى بايلانىستارى بويىنشا قولداۋ مەن ىلگەرىلەتۋدىڭ ماڭىزى زور», دەپ اتاپ ءوتتى ماۋلەن اشىمباەۆ.
رۋستامي ەموماليدىڭ ايتۋىنشا, تاجىكستاننىڭ سىرتقى ساياساتىندا قازاقستانمەن ىنتىماقتاستىق باسىم ورىنعا يە. ولي ءماجليسى ميللي ءماجليسىنىڭ توراعاسى ەكىجاقتى جانە كوپجاقتى سيپاتتاعى پارلامەنتارالىق ىنتىماقتاستىقتى نىعايتۋعا زور ماڭىز بەرەتىنىن اتاپ ءوتتى.
«قازاقستان ورتالىق ازيانىڭ ساياسي جانە ەكونوميكالىق ومىرىندە ماڭىزدى ءرول اتقارادى. ءسىزدىڭ ەلىڭىز تاۋەلسىزدىك جىلدارىندا الەۋمەتتىك-ەكونوميكالىق دامۋ مەن حالىقارالىق ارەناداعى ءوزىنىڭ بەدەلىن نىعايتۋدا زور تابىستارعا قول جەتكىزدى. ەلدىڭ ۇزاق مەرزىمدى كەلەشەككە نەگىزدەلگەن كوپتەگەن دامۋ باعدارلامالارى مەن ستراتەگياسى ازىرلەنىپ, تابىستى ىسكە اسۋدا. وسى ورايدا ءسىزدى جانە باۋىرلاس قازاقستان حالقىن تاۋەلسىزدىكتىڭ الداعى 30 جىلدىق مەرەيتويىمەن قۇتتىقتاعىم كەلەدى», دەپ اتاپ ءوتتى رۋستامي ەمومالي.
تاراپتار اڭگىمە بارىسىندا ەكىجاقتى جانە كوپجاقتى ىنتىماقتاستىقتىڭ بارلىق سالالارى بويىنشا سىندارلى ديالوگتى قالىپتاستىرۋدىڭ ماڭىزدىلىعىن اتاپ ءوتتى. اتاپ ايتقاندا, ينۆەستيتسيالار, ساۋدا-ەكونوميكالىق بايلانىستار, اۋىل شارۋاشىلىعى, كولىك-كوممۋنيكاتسيالىق ينفراقۇرىلىم, تسيفرلاندىرۋ ماسەلەلەرى بويىنشا بىرلەسكەن جۇمىستىڭ ماڭىزى زور.
ماۋلەن اشىمباەۆ سۋ-ەنەرگەتيكا سالاسىنداعى ىنتىماقتاستىقتى جانداندىرۋ قاجەتتىگىنە ەرەكشە نازار اۋداردى.
«جىل سايىن ورتالىق ازيا وڭىرىندەگى سۋ تاپشىلىعى ماسەلەسىنىڭ ماڭىزى ارتا تۇسەتىنى بىزگە تۇسىنىكتى بولىپ وتىر. بۇل اقيقاتتى ءبىز قابىلداۋعا ءتيىسپىز. وسىعان بايلانىستى باحري توچيك سۋ قويماسىنىڭ سۋ رەسۋرستارىن بىرلەسىپ پايدالانۋ تۋرالى ۇشجاقتى كەلىسىم جاساسۋ اسا ماڭىزدى بولار ەدى. بۇل كەلىسىم سىرداريا وزەنى باسسەينىنىڭ سۋ رەسۋرستارىن تۇراقتى نەگىزدە بىرلەسىپ پايدالانۋ ماسەلەلەرىن رەتتەۋ ءۇشىن پارمەندى تەتىك بولا الار ەدى», دەپ اتاپ ءوتتى ماۋلەن اشىمباەۆ.
كەزدەسۋگە قاتىسۋشىلار اۋعانستان پروبلەمالارىنا نازار اۋداردى. اۋعانستانداعى تۇراقتىلىققا قول جەتكىزۋ ايماقتىق قاۋىپسىزدىكتى قامتاماسىز ەتۋدىڭ ماڭىزدى فاكتورى ەكەنىنە كەلىسە وتىرىپ, تاراپتار وسى باعىتتا ءوزارا بەلسەندى ءىس-قيمىل مەن ىنتىماقتاستىققا دايىن ەكەندىكتەرىن ايتتى.
سەنات توراعاسى سونداي-اق قازاقستان اۋعانستاننىڭ تەرروريزم مەن ەسىرتكىدەن ازات بەيبىت جانە تاۋەلسىز مەملەكەت رەتىندە قالىپتاسۋىن جاقتايتىنىن اتاپ ءوتتى.
بۇگىن قول قويىلعان قازاقستان رەسپۋبليكاسى پارلامەنتى سەناتى مەن تاجىكستان رەسپۋبليكاسى ولي ءماجليسى ميللي ءماجليسى اراسىنداعى ىنتىماقتاستىق تۋرالى كەلىسىم ءوزارا پارلامەنتارالىق ءىس-قيمىلدىڭ دامۋىنا جاڭا سەرپىن بەرەدى. قۇجات پارلامەنتارالىق ىنتىماقتاستىق جونىندەگى تۇراقتى كوميسسيا قۇرۋدى كوزدەيدى.
رۋستامي ەمومالي سول كۇنى «وتان قورعاۋشىلار» مونۋمەنتىنە گۇل شوقتارىن قويىپ, «استانا باس جوسپار» عىلىمي-زەرتتەۋ جوبالاۋ ينستيتۋتىنا جانە «iKomek» مونيتورينگ جانە جەدەل ارەكەت ەتۋ ورتالىعىندا بولدى.