قاراعاندىدا جولاۋشىلار اۆتوبۋسىنىڭ جۇرگىزۋشىسى مەن كاسسيرى بيلەت پ ۇلىنا جەتپەگەن 30 تەڭگەسىنە بولا التى جاسار بالانى اناسىمەن بىرگە ايازدى كۇنى ايدالاعا تاستاپ كەتكەن. مۇنى «31 تەلەارنا» حابارلادى.
«قاراعاندىدا تولەمگە جەتپەي قالعان 30 تەڭگە التى جاسار بالانىڭ دەنساۋلىعىنا زالال كەلتىردى. مارشرۋتتى اۆتوبۋستىڭ جۇرگىزۋشىسى جول اقىسىنا جەتپەي قالعان وسىنشا تەڭگەسى ءۇشىن جولاۋشى ايەلدى بالاسىمەن بىرگە قالانىڭ ءبىر شەتىنە اپارىپ, تاستاپ كەتكەن», – دەلىنگەن حابارلامادا.
انىقتالعانداي, تاتيانا زاحاروۆا سول كۇنى تاڭەرتەڭ كەنجە ۇلىن مەكتەپكە اپارا جاتادى. ولارعا بار-جوعى ءۇش ايالداما ءجۇرۋ كەرەك بولعان. كەلىنشەك اۆتوبۋسقا مىنگەن كەزىندە عانا قالتاسىنداعى اقشاسىنىڭ جەتىمسىز ەكەنىن بايقايدى. سوندىقتان كاسسيرگە 80 تەڭگە ورنىنا جانىندا بار 50 تەڭگەسىن بەرەدى. ال كاسسير بۇعان جاۋاپ رەتىندە ولاردى ءوز ايالدامالارىنان تۇسىرمەي, قالانىڭ ءبىر شەتىنە اپارىپ تاستاپ كەتەدى.
الايدا, ايدالادا قالعان زاحاروۆانىڭ بالاسىن الىپ, ۇيىنە قايتۋعا اقشاسى بولمايدى. سەبەبى, سوڭعى 50 تيىنىن جاڭاعى كاسسير قاعىپ العان. ونىمەن قويماي, قاساقانا قالانىڭ ءبىر شەتىنە دەيىن جەتكىزىپ, ءتۇسىرىپ كەتكەنى تاعى بار. بۇل نە دەگەن كەسەپاتتىق دەسەڭىزشى!
سوسىن انا مەن بالا ايازدى كۇنى ايدالادا ءبىراز تۇرىپ قالادى. ەگەر سول كەزدە پوليتسەي ءپاترۋلىنىڭ ماشيناسى كەزىگىپ, الا كەتپەگەندە, بۇلاردىڭ جاعدايى ءتىپتى مۇشكىل بولار ەدى. سونىڭ وزىندە كىشكەنتاي بالا سۋىققا ابدەن ۇرىنىپ قالعان ەكەن.
«قاراساق, ايازدان ازاپ شەككەن بالاقاي جىلاپ تۇر. كوزىنەن اققان جاسى سول ماڭدا قاتىپ قالىپتى. وسىنداي بوراندى كۇنى بالالى ايەلدى دالاعا تاستاپ كەتىپ جۇرگەن قانداي تاسجۇرەكتەر ەدى! مەنى ولاردىڭ وسىنشالىقتى قاتىگەزدىكتەرى قاتتى قايران قالدىردى», – دەيدى جول-پاترۋل قىزمەتىنىڭ پوليتسەيى الەكساندر سادۋاقاسوۆ.
ناتيجەسىندە ءبىرىنشى سىنىپتىڭ وقۋشىسى قالپاقتاي تۇسەدى. ول دەنە قىزۋىمەن شۇعىل اۋرۋحاناعا جاتقىزىلادى. دارىگەرلەر التى جاسار ۇلدىڭ اۋىرىپ قالۋى دەنەسىنىڭ توڭازىعانىنان بولعانىن ايتىپ وتىر.
تاتيانا زاحاروۆا قازىر جۇرگىزۋشىنىڭ ۇستىنەن قالالىق كوممۋنالدىق شارۋاشىلىق جانە كولىك بولىمىنە شاعىم بەرىپ قويىپتى. ەگەر ودان ناتيجە بولماسا, بۇدان ءارى سوت پەن پروكۋراتۋراعا شاعىمدانباقشى.
قۇرىش نۇرىمبەت.