شاراينا
«ءال-كايدانىڭ» مالىمدەمەسى
«ءال-كايدا» حالىقارالىق تەررورلىق ۇيىمى «يراك جانە لەۆانتا يسلام مەملەكەتى» راديكالدى يسلاميستىك توبىنا قولداۋ كورسەتۋدى توقتاتاتىنىن مالىمدەدى. وعان توپ مۇشەلەرىنىڭ «ءال-كايدا» ليدەرى ايمان ءاز-ءزاۆاحيريدىڭ بۇيرىقتارىنا باعىنباۋى سەبەپ بولعان سىڭايلى.
وتكەن جىلدىڭ مامىرىندا ءاز-زاۆاحيري «يراك جانە لەۆانتا يسلام مەملەكەتى» توبىنىڭ باسشىلىعىنا سيرياداعى «ءال-كايدانىڭ» «ءان-نۋسرا مايدانى» اتتى ۇياشىعىنان تىس ارەكەت ەتۋ جونىندە تاپسىرما بەرگەن بولاتىن. دەگەنمەن, «يراك جانە لەۆانتا يسلام مەملەكەتى» توبىنىڭ ليدەرى ءابۋ باكر ءال-باعدادي ءاز-ءزاۆاحيريدىڭ وكىمىن تىڭداماي, «ءان-نۋسرا مايدانىمەن» بىرىگۋ تۋرالى تالپىنىس جاساعان ەدى.
83 ادام بومبالاۋ قۇربانى بولدى
سيريا اۋە قارۋلى كۇشتەرىنىڭ الەپپو قالاسىن بومبالاۋى سالدارىنان 83 ادام قازا تاپقان. بۇل جونىندە لوندوندا ورنالاسقان سيرياداعى ادام قۇقىقتارى جونىندەگى قاداعالاۋشى كەڭەس حابارلاعان.
قۇقىق قورعاۋشىلاردىڭ ايتۋلارىنا قاراعاندا, سوققىدان قۇربان بولعانداردىڭ باسىم كوپشىلىگى بەيبىت تۇرعىندار. بەلسەندىلەر سونىمەن بىرگە, جارىلعىش زاتتار, بولات بولشەكتەر مەن جانعىش زاتتار سالىنعان كانيسترلاردىڭ قولدانىلعانىن اتاپ كورسەتۋدە. ايتا كەتۋ كەرەك, ۇكىمەت اسكەرى ۇزاق ۋاقىتتان بەرى الەپپونىڭ بىرقاتار اۋداندارىنا باقىلاۋ جاساپ وتىرعان ەرەۋىلشىلەردى قۋىپ شىعۋعا تالپىنۋدا.
جانارتاۋدان تۋىنداعان قاتەر
ەكۆادور بيلىگى بىرنەشە كۇننەن بەرى بەلسەندىلىك تانىتىپ تۇرعان تۋنگۋراۋا جانارتاۋى ورنالاسقان وڭىردە قاۋىپ تۋى مۇمكىن ەكەندىگىن ايتىپ, ەسكەرتۋلەر جاساۋدا.
ونىڭ سىرتىندا جانارتاۋعا جاقىن ورنالاسقان ەلدى مەكەندەردەن بىرنەشە جۇزدەگەن ادامدى قاۋىپسىز جەرلەرگە كوشىرۋ جونىندە شەشىم قابىلدانعان. جانارتاۋ وتكەن سەنبىدەن باستاپ اسپانعا كۇل مەن تاس لاقتىرا باستادى. ال ول جەرگىلىكتى بيلىكتى بىرقاتار جولداردى جابۋعا ماجبۇرلەپ وتىر. اتالمىش جانارتاۋ 1999 جىلدان بەرى بەلسەندىلىك تانىتۋدا.
سالۆادوردا پرەزيدەنتتىك سايلاۋ ءوتتى
سالۆادوردا پرەزيدەنت سايلاۋى شەڭبەرىندە داۋىس بەرۋلەر اياقتالىپ, سايلاۋ ۋچاسكەلەرى جابىلدى. بۇل تۋرالى لاتىنامەريكالىق باق-تار حابارلاپ وتىر.
پرەزيدەنتتىككە كانديداتتار سانى بەسەۋ بولعان, بىراق, الەۋمەتتىك ساۋالنامالار بويىنشا, ولاردىڭ ەكەۋىنىڭ عانا جەڭىسكە جەتۋگە مۇمكىندىكتەرى بار. وسىلايشا, سولشىل تسەنتريستىك پارتيانىڭ مۇددەسىن قورعايتىن ەلدىڭ قازىرگى ۆيتسە-پرەزيدەنتى سالۆادور سانچەس سەرەن فاۆوريت اتانىپ وتىر. ونىڭ قارسىلاسى كونسەرۆاتيۆتى ۇلتتىق-رەسپۋبليكالىق اليانس مۇشەسى نورمان كيحانو بولىپ تابىلادى. ەگەر كانديداتتاردىڭ بىردە-بىرەۋى ەڭ تومەنگى 50 پايىز داۋىستى الا الماسا, ولار 9 ناۋرىزدا وتەتىن ەكىنشى تۋردا قايتا كەزدەسەتىن بولادى.
ەلشىلىك جانىنداعى جارىلىس
يەمەننىڭ استاناسى ساناداعى فرانتسيا ەلشىلىگىنە جاقىن جەردە بىرنەشە مينومەت سناريادتارى جارىلدى, دەپ حابارلادى دۇيسەنبى كۇنى ارابارالىق Al Arabiya تەلەارناسى.
ونىڭ سىرتىندا ديپلوماتيالىق ميسسيادان بىرنەشە ءجۇز مەتر جەردە جارىلعىش زات سالىنعان ءاۆتوموبيلدىڭ دە كۇل-تالقانى شىققان. ال مۇنىڭ الدىندا يەمەننىڭ استاناسىندا ەكى سنارياد قورعانىس مينيسترلىگىنە جاقىن جەرگە, تاعى ەكى سنارياد ەلدىڭ بۇرىنعى پرەزيدەنتى الي ابداللى سالەحتىڭ ءۇيىنىڭ ماڭايىنا قۇلاعان بولاتىن. بۇل جارىلىستار سوڭىنىڭ ەكى جاق اراسىنداعى اتىسقا ۇلاسقانىن دا ايتا كەتۋ قاجەت.
حيللاري كلينتون جانە جاڭا سانكتسيالار
اقش-تىڭ وتستاۆكاداعى مەملەكەتتىك حاتشىسى حيللاري كلينتون امەريكالىق سەناتور-دەموكرات كارل لەۆينمەن جازباشا حابارلاسۋ كەزىندە ءوزىنىڭ يرانعا قاتىستى جاڭا سانكتسيالار ەنگىزۋگە قارسى ەكەنىن مالىمدەگەن.
قازىر, يرانمەن شىنايى كەلىسسوزدەر ءجۇرىپ جاتقان كەزدە ءبىز ولاردىڭ ماسەلەنى شەشۋدى تۇراقتى نەگىزگە قانشالىقتى كوشىرە الاتىنىن تەكسەرۋگە ءتيىسپىز, دەپ اتاپ كورسەتكەن ول سەناتوردىڭ جولداۋىنا جاۋاپ قايتارا وتىرىپ. ح.كلينتوننىڭ بۇل ءسوزدى 26 قاڭتار كۇنى جازعانىنا قاراماستان, ول تۋرالى كوپشىلىككە تەك وتكەن جەكسەنبى كۇنى عانا ءمالىم بولىپ وتىر. ءسوز ورايىندا سەناتورلاردىڭ جارتىسىنان كوبىنىڭ يرانعا قارسى جاڭا سانكتسيالار ەنگىزۋدى قولدايتىنىن دا ايتا كەتۋ قاجەت.
ءبىر جىنىستى نەكەگە قارسىلىق
مىڭداعان فرانتسۋزدار پاريجدە جەكسەنبى كۇنى وتكەن ءبىر جىنىستى نەكەنى زاڭداستىرۋعا قارسى ەرەۋىلگە قاتىستى. بۇل تۋرالى «فيگارو» گازەتىنىڭ ۆەب-سايتى حابارلاعان.
اكتسيا ۇيىمداستىرۋشىلاردىڭ وعان 500 مىڭ ادام قاتىستى دەگەنىنە قاراماستان پوليتسەيلەر 80 مىڭ ادامنىڭ عانا قاتىسقانىن ايتۋدا. ليون قالاسىندا دا ءدال وسىنداي ءىس-شارالار ءوتىپ, وعان 20 مىڭنان 40 مىڭعا دەيىنگى ادام قاتىسقان. ايتا كەتۋ كەرەك, وتكەن جىلدىڭ ساۋىرىندە فرانتسيا الەمدەگى ءبىر جىنىستى نەكەنى زاڭداستىرعان 14-ەلگە اينالعان بولاتىن.
ەۋروپاداعى تابيعات اپاتى
اۋا رايى ەۋروپادا وتە قولايسىز جاعدايلار تۋىنداتىپ, ونىڭ سوڭى بىرنەشە ادامنىڭ قازا تابۋىنا اكەلىپ سوقتىرۋدا.
اقپاننىڭ العاشقى كۇندەرىندە ەۋروپانىڭ بىرنەشە مەملەكەتتەرىندە قولايسىز اۋا رايى قالىپتاسقان. ودان, اسىرەسە, يتاليا, يسپانيا, سەربيا, سلوۆەنيا, اۆستريا جانە شۆەيتساريا مەملەكەتتەرى قاتتى زارداپ شەگىپ وتىر. تولاسسىز جاۋعان جاۋىن يتاليادا سۋ تاسقىنىن تۋعىزىپ, سونىڭ سالدارىنان 3 ادام قازا تاپقان. يسپانيادا الىپ تولقىنداردىڭ تۋريستىك ينفراقۇرىلىمعا ەلەۋلى زاقىم كەلتىرگەنى بەلگىلى بولىپ وتىر. ال سەربيا مەن سلوۆەنيا تۇرعىندارى قالىڭ جاۋعان قاردىڭ استىندا قالۋدا. ولارعا اسكەريلەر كومەككە كەلىپ, قار استىندا قالعانداردى تانكتەر مەن تىكۇشاقتار كومەگىمەن قۇتقارۋدا. شىعىس ەۋروپادا قارلى بوران مەن كۇشتى داۋىل تۇرىپ, ونىڭ سالدارىنان بىرقاتار وڭىرلەردە الدىن الا ەسكەرتۋلەر جاساۋعا تۋرا كەلگەن. سول سياقتى شۆەيتساريا مەن اۆستريادا دا قار كوشكىنى بولۋ قاۋپى تۋىنداپ وتىر.
ينتەرنەت ماتەريالدارى نەگىزىندە ازىرلەندى.