باتا الۋ

الماتىدا «استانا وپەرا»  تەاترىنىڭ تۇڭعىش گاسترولى باستالدى

الماتىنىڭ مادەني ومىرىندەگى ايتۋلى وقيعانىڭ ءبىرى – «استانا وپەرا» تەاترىنىڭ العاشقى گاسترولى بولىپ تۇر. ەلورداداعى ەڭ ەڭسەلى ونەر ورداسىنىڭ سىرتقا ساپارى وتاندىق مادەنيەتتىڭ مەككەسىندەي بولعان الماتىدان باستالۋى دا كەزدەيسوقتىق ەمەس. استانالىق وپەرا تەاترى شەت مەملەكەتتەردە ۇلتىمىزدىڭ اتىن شىعارىپ, سالتانات قۇرماس بۇرىن, وسىدان 80 جىل بۇرىن الماتىدا ۇلتتىق وپەرا جانە بالەت ونەرىنىڭ ۋىعىن قاداپ, كەرەگەسىن كەرگەن قازاقتىڭ ءبىر كەزدەگى ايتۋلى ۇل-قىزدارىنىڭ ارۋاعىنا باس ءيىپ, باتاسىن الۋدى ءجون ساناپتى.   مىنا عاجاپ سايكەستىكتى قاراڭىز, ءبىر كۇن ارتىق-كەمى جوق, تۋرا سەگىز اي بۇرىن  «استانا وپەرا» تەاترىن قۇرۋ تۋرالى قۇجاتقا قول قويىلعان. ال الداعى كۇندەرى الماتىداعى اباي اتىنداعى مەملەكەتتىك اكادە­ميالىق وپەرا جانە بالەت تەاترى 80 جىلدىعىن اتاپ وتكەلى وتىر. سوندىقتان دا الماتىدا جەتى كۇن  بويى ساحنادا سالتانات قۇراتىن «استانا وپەرا» تەاترىنىڭ العاشقى ءباسپاسوز ءماسليحاتىن دا تاريحي ساتكە جاتقىزۋعا ابدەن بولادى. العاشقى گاسترول, العاشقى كەزدەسۋلەر... ەلوردادان تىس جەردەگى تۇڭعىش كورەرمەندەر مەن سۇحباتتار. سونىمەن, الەمدەگى ەڭ جاس وپەرا تەاترىنىڭ ديرەكتورى تولەگەن مۇحامەدجانوۆ وڭتۇستىك استانادا وتكەن ءباسپاسوز ءماسليحاتىندا گاسترولدىك ساپاردىڭ جاي-جاپسارى تۋرالى جان-جاقتى اڭگىمەلەدى. سيرەك بولاتىن مۇنداي ءباسپاسوز ءماسليحاتىن باق وكىلدەرى دە ءساتتى پايدالانىپ, ارىپتەستەرىمىز وپەرا قويىلىمدارى, بالەت ونەرىنە قاتىستى ساۋالداردىڭ تيەگىن اعىتتى. ال الماتىداعى بايىرعى وپەرا تەاترى – قاراشاڭىراق ونەر ورداسى دا جول بىلەتىندىگىن تانىتىپ, ەلوردادان كەلگەن ونەر ۇجىمىنا ۇلتتىق بەكزات ونەردىڭ ايتۋلى تۇلعالارىنىڭ تاريحي پورترەتتەرىن تارتۋ ەتتى. ءبىزدىڭ اسەرشىل كوڭىلىمىزدە قايتا تۋماس بۇل بەينەلەر الىستان قول بۇلعاپ, ارقايسىسى ۇرپاقتىڭ ونەردەگى ەندىگى ۇلى باستامالارىنا قولداۋ كورسەتىپ, باتا بەرىپ تۇرعانداي كورىنگەنى راس. وسىدان كەيىن «استانا وپەرا» تەاترى مەن اباي اتىنداعى مەملەكەتتىك اكادەميالىق وپەرا جانە بالەت تەاترى ماڭگىلىك ارىپتەستىك پەن ىنتىماقتاستىق تۋرالى مەموراندۋمعا قول قويدى. ارينە, ءباسپاسوز ءماسليحاتىندا «استانا وپەرا»  تەاترىنىڭ الماتىعا الىپ كەلگەن قويىلىمدارى تۋرالى دا ءسوز بولدى. – ءبىز ءۇشىن بۇل ساپار سىناقپەن تەڭ, سەبەبى, الدىندا قازاقستانمەن قاتار شەتەلدە وتەتىن ۇلكەن گاسترولدەر تۇرعان «استانا وپەرا» تەاترى ءۇشىن بۇل ۇلكەن قادام, – دەدى تولەگەن مۇحامەدجانوۆ. گاسترولدىك باعدارلامانىڭ ءبىرىن­شى كۇنى, ياعني بۇگىن رەسەيدىڭ حالىق ءارتىسى يۋري الەكساندروۆيچتىڭ قويى­لىمىنداعى  قازاق وپەراسىنىڭ مارجانى – «ءبىرجان-سارا» ۇسىنى­لادى. ال 5 اقپاندا كورنەكتى كومپوزيتور سەرگەي پروكوفەۆتىڭ «پەتيا مەن قاسقىر» سيمفونيالىق ەرتەگىسى جاس كو­رەرمەندەرىن قۋانتسا, وسى كۇ­نى كەشكە «استانا وپەرانىڭ» سيم­فونيالىق وركەسترى كونتسەرت بەرەدى. 6 اقپاندا كوپشىلىك نازارىنا عالامات-كونتسەرت ۇسىنىلماق. حور ونەرىن سۇيەتىن حالايىق 7 اقپاندا قازاقستان رەسپۋبليكاسىنا ەڭبەك سىڭىرگەن قايراتكەر ەرجان ءداۋىتوۆ جەتەكشىلىك ەتەتىن «استانا وپەرا» كامەرالىق حو­رىنىڭ كونتسەرتىن تاماشالاي الادى. سول سياقتى, تەاتردىڭ بالەتتىك ترۋپپاسى الەمدىك حورەوگرافيانىڭ حاس ۇلگىسى – «رومەو مەن دجۋلەت­تا­نى» شارل ءجيۋدتىڭ قويىلىمىندا ساحناعا الىپ شىعادى. الەمدەگى ەڭ جاس بالەت ترۋپپاسىنىڭ قارى­مىن تاماشالاۋعا اسىققاندار بۇل مۇمكىندىكتى جىبەرمەۋى ءتيىس. «اس­تانا وپەرا» تەاترى گاسترولىنىڭ افي­شا­­سىن­داعى سپەكتاكلدەر ءتىزىمىن 10 اق­پاندا رەسەيدىڭ حالىق ءارتىسى بو­ريس ەيفماننىڭ قويىلىمىنداعى «رو­دەن» بالەتى تۇيىندەيدى. ايناش ەسالي, «ەگەمەن قازاقستان». الماتى.