سەنات جانىنداعى جاس ساراپشىلار كلۋبىنىڭ مۇشەلەرى كەزەكتى وتىرىستا مەديا, زەرتتەۋ سالاسى مەن مەملەكەتتىك باسقارۋداعى ساراپتامالىق تاسىلدەردى دامىتۋعا باعىتتالعان قوعامدىق جوبانى قۇرۋ مۇمكىندىگىن تالقىلادى, دەپ حابارلايدى Egemen.kz.
«شىنىندا دا, كوپتەگەن سالالاردا اناليتيكالىق تاسىلدەردىڭ السىرەۋى بايقالادى. بۇل ءۇردىس مەملەكەتتىك باسقارۋ ءۇشىن ۇلكەن پروبلەمالار تۋعىزادى. سەبەبى بۇل سالاداعى شەشىمدەر بايىپتى اناليتيكالىق زەرتتەۋ نەگىزىندە قابىلدانۋى كەرەك. وكىنىشكە وراي, كوپتەگەن شەشىمدەر جاعدايعا بايلانىستى, تۋىنداعان داعدارىستارعا رەاكتسيا رەتىندە قابىلدانادى. كلۋبتىڭ الدىڭعى وتىرىستارىنىڭ بىرىندە بۇل جاعداي قازىرگى الەمدەگى گۋمانيتارلىق ءبىلىم داعدارىسىمەن بايلانىستى دەگەن پىكىرمەن بولىسكەن ەدىم. وسىعان بايلانىستى مەن كلۋب مۇشەلەرىنىڭ وسىنداي قوعامدىق تالداۋ مەكتەبىن قۇرۋ تۋرالى ۇسىنىسىن وتە وزەكتى دەپ سانايمىن», دەدى ماۋلەن اشىمباەۆ.
مەكتەپ تىڭداۋشىلارى اناليتيكالىق ماتىندەردى جازۋ سياقتى قولدانبالى داعدىلاردى, زەرتتەۋ ءادىسناماسىن, دەرەكتەر بازاسىمەن جۇمىستى, مەملەكەتتىك باسقارۋدا, حالىقارالىق قاتىناستار مەن ديپلوماتيادا قولدانىلاتىن اناليتيكالىق تاسىلدەردى مەڭگەرە الادى. دارىستەر وقۋ جانە ترەنينگتەر وتكىزۋ ءۇشىن كورنەكتى قازاقستاندىق تالداۋشىلار مەن زەرتتەۋشىلەردى شاقىرۋ جوسپارلانۋدا.