ەكىباستۇز قالاسىن دامىتۋدىڭ 2025 جىلعا دەيىنگى كەشەندى جوسپارى بويىنشا جىل سايىن كەمىندە 558 باسپانا بەرۋ كوزدەلگەن, دەپ حابارلايدى Egemen.kz.
بۇل تۋرالى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ۇكىمەت وتىرسىندا ايتتى.
«پاۆلودار وبلىسى ەكىباستۇز قالاسىن دامىتۋدىڭ كەشەندى جوسپارى بويىنشا يندۋستريا جانە ينفراقۇرىلىمدىق دامۋ مينيسترلىگى 41,6 ملرد تەڭگەنىڭ 13 ءىس-شاراسىنا جاۋاپتى. شاھاردا 2025 جىلعا دەيىن جالپى اۋدانى 199,4 مىڭ شارشى مەتر نەمەسە 2,8 مىڭ تۇرعىن ءۇيدى پايدالانۋعا بەرۋ جوسپارلانعان», دەدى مينيستر.
اتاپ ايتساق, 2021-2024 جىلدار ارالىعىندا ءار جىل سايىن 39,8 مىڭ شارشى مەتر بولاتىن 558 تۇرعىنجاي, 2025 جىلى جيىنتىق اۋدانى 40,2 مىڭ شارشى مەتر بولاتىن 559 تۇرعىنجاي بەرۋ جوسپارلانعان.
«كەشەندى جوسپار شەڭبەرىندە مەملەكەت قاراجاتى ەسەبىنەن تۇرعىنداردى 67,5 مىڭ شارشى مەتر نەمەسە 748 جالعا بەرىلەتىن جانە كرەديتتىك پاتەرمەن قامتاماسىز ەتۋ كوزدەلگەن. جاپپاي تۇرعىن ءۇي قۇرىلىسى سالىناتىن اۋدانداردى قاجەتتى ينجەنەرلىك ينفراقۇرىلىممەن قامتاماسىز ەتۋ ءۇشىن 2023 جىلى 3 ملرد تەڭگە ءبولۋ جوسپارلانعان. سوعان سايكەس 370 جەر ۋچاسكەسى ينجەنەرلىك ينفراقۇرىلىممەن قامتاماسىز ەتىلەدى», دەدى بەيبىت اتامقۇلوۆ.
ءمينيستردىڭ ايتۋىنشا, بۇل جوبالاردى ىسكە اسىرعان كەزدە قالادا 1200 ۋاقىتشا جۇمىس ورنى اشىلادى.