رەسپۋبليكالىق ارنايى كوميسسيانىڭ قاۋلىسىمەن 20 قىركۇيەكتەن باستاپ وزبەكستاندا اشىق الاڭدار مەن جابىق كەشەندەردە ءىس-شارالار وتكىزۋگە رۇقسات بەرىلدى, دەپ حابارلايدى Egemen.kz uza.uz اقپاراتتىق اگەنتتىگىنە سىلتەمە جاساپ.
«ارنايى كوميسسيانىڭ كەزەكتى وتىرىسىندا رەسپۋبليكاداعى كارانتيندىك تالاپتاردى جۇمسارتۋ ارقىلى تۇرعىنداردىڭ دەمالىس كۇندەرىن مازمۇندى وتكىزۋگە جانە مادەني-رۋحاني ازىق الۋعا قولايلى جاعدايلار جاساۋ ماسەلەسى جان-جاقتى تالقىلاندى. اتاپ ايتقاندا, ءتيىستى ورگانداردىڭ ۇسىنىستارىن ەسكەرە وتىرىپ, رەسپۋبليكالىق ارنايى كوميسسيانىڭ 2021 جىلدىڭ 20 قىركۇيەگىندەگى شەشىمى بويىنشا مادەني-ساۋىق شارالارى (تەاتر, كينو, كونتسەرت زالدارى), بۇقارالىق شارالار مەن كەزدەسۋلەردى اشىق الاڭدار مەن جابىق كەشەندەر دە وتكىزۋگە رۇقسات بەرىلدى», دەلىنگەن حابارلامادا.
مادەني, ويىن-ساۋىق, بۇقارالىق ءىس-شارالار مەن كەزدەسۋلەردى ۇيىمداستىرۋدا كەلەسى كارانتيندىك شەكتەۋلەر ساقتالادى: مادەني ويىن-ساۋىق نىساندارىنىڭ جۇمىسشىلارى مەن قىزمەتشىلەرى جانە قوعامدىق ءىس-شارالاردى ۇيىمداستىرۋشىلار, قىزمەت كورسەتۋشىلەر كوروناۆيرۋستىق ۆاكتسينانىڭ كەمىندە 2 دوزاسىن (ۆاكتسينانىڭ كەز كەلگەنى) قابىلداعانى بويىنشا QR-كودتى سەرتيفيكاتى بولۋى تقاجەت;
ويىن-ساۋىق ورتالىقتارىنا كەلۋشىلەر; مەديتسينالىق ماسكادا بولۋ; انتيسەپتيكتەردى قولدانۋ; نىسانعا كىرۋ كەزىندە دەنە تەمپەراتۋراسىن ولشەۋ سياقتى ماڭىزدى سانيتارلىق-گيگيەنالىق ەرەجەلەردى قاتاڭ ساقتاۋى ءتيىس. بۇل رەتتە اتاۋلى نىسان اۋماعىنا (تەاتر, كينو, كونتسەرت زالدارى) جانە كوپشىلىك جينالاتىن ءىس-شارالارعا كوروناۆيرۋسقا قارسى ۆاكتسيناتسيا تۋرالى QR-كود سەرتيفيكاتى بار كەلۋشىلەردى عانا كىرگىزۋ ۇسىنىلدى.