وزبەكستاندا پرەزيدەنت سايلاۋىنا دەيىن ءبىر اي قالدى. پرەزيدەنتتىك سايلاۋعا العاش رەت ايەل قاتىسپاق, دەپ حابارلايدى Egemen.kz.
Sputnik وزبەكستان حابارلاعانداي, وزبەكستان ورتالىق سايلاۋ كوميسسياسى 14 قىركۇيەكتەگى وتىرىستا الداعى پرەزيدەنت سايلاۋىنا كانديدات ايەل - وزبەكستاننىڭ حالىقتىق دەموكراتيالىق پارتياسىنان ماكسۋدا ۆاريسوۆانىڭ تىركەلۋىن بەكىتتى. قازىردىڭ وزىندە رەسپۋبليكادا رەسمي تىركەلگەن بەس پارتيانىڭ وكىلدەرىنە كانديداتتىق كۋالىكتەر تابىس ەتىلدى.
ماكسۋدا ۆاريسوۆا - تاجىريبەلى دارىگەر. ول كوپ جىلدار بويى دەنساۋلىق ساقتاۋ جۇيەسىندە, مەملەكەتتىك جانە قوعامدىق باسقارۋ ورگاندارىندا قىزمەت ەتكەن. قازىرگى ۋاقىتتا ول ازاماتتاردىڭ دەنساۋلىعىن ساقتاۋ ماسەلەلەرى جونىندەگى ولي ماجليس (پارلامەنت) زاڭ شىعارۋ پالاتاسىنىڭ كوميتەتى توراعاسىنىڭ ورىنباسارى لاۋازىمىنا يە. ونىڭ سايلاۋداعى باستى باسەكەلەسى قازىرگى مەملەكەت باسشىسى شاۆكات ميرزيەەۆ بولماق.
Gazeta.uz باسىلىمى حابارلاعانداي, ماكسۋدا ۆاريسوۆا «حالىق ماسەلەلەرىن ىشكى جاعىنان بىلەتىن قاراپايىم انا, قاراپايىم ايەل» رەتىندە قانديداتۋراسىن ۇسىنعان.
الداعى سايلاۋدا داۋىس بەرۋ پروتسەسىن 50 ەلدىڭ جانە ونداعان حالىقارالىق ۇيىمداردىڭ وكىلدەرى باقىلايدى دەپ كۇتىلۋدە.