قازىرگى ۋاقىتتا اتىراۋ وبلىسىندا 8409 كاسىپكەرلىك نىسانى «Ashyq» اقپاراتتىق جۇيەسىنە قوسىلعان, دەپ حابارلايدى Egemen.kz.
«13 قىركۇيەكتەگى جاعداي بويىنشا وبلىس بويىنشا «Ashyq» جۇيەسىنە قوسىلعان 8409 كاسىپكەرلىك نىسانى جۇمىسىن جالعاستىرۋدا. قىركۇيەك ايىندا وڭىردە «Ashyq» جۇيەسىنىڭ 4848 نىسانى تەكسەرىلدى, ونىڭ 292-ءسى سوڭعى 2 اپتا ىشىندە جۇيەنىڭ قولدانىلماۋىنا بايلانىستى 2 اپتا مەرزىمگە باعدارلامادان شىعارىلدى», دەدى اتىراۋ وبلىسى اكىمىنىڭ ورىنباسارى باقىتگۇل حامەنوۆا وكق-دا وتكەن ءباسپاسوز كونفەرەنتسياسىندا.
سونداي-اق اكىمنىڭ ورىنباسارى وڭىردەگى ەپيدەميولوگيالىق احۋال تۋرالى ايتتى.
«ەپيدەميا باستالعاننان بەرى وبلىستا كوروناۆيرۋستىق ينفەكتسياسى بار 49500 ادام انىقتالدى. سوڭعى تاۋلىكتە 98 جاعداي تىركەلدى. جالپى, بۇگىنگى تاڭدا كۆي-مەن اۋىراتىن ناۋقاستاردىڭ 93%-ى ساۋىعىپ كەتتى. سوڭعى ايدا وڭىردە كوروناۆيرۋستىق ينفەكتسيانىڭ تارالۋى وتكەن ايمەن سالىستىرعاندا 5,6 ەسەگە تومەندەدى», دەپ اتاپ ءوتتى سپيكەر.
ونىڭ دەرەكتەرىنە سايكەس, وڭىردە 624 ورىنعا ارنالعان ينفەكتسيالىق ستاتسيونار, ونىڭ ىشىندە 40 رەانيماتسيالىق توسەك-ورىن ازىرلەندى. قازىرگى ۋاقىتتا ينفەكتسيالىق ستاتسيوناردا 518 ناۋقاس ەم الۋدا جانە وبلىس بويىنشا توسەك جۇكتەمەسى 22,0%-دى قۇرايدى.