ەلوردا اكىمى التاي كولگىنوۆ Nur-Sultan theatre week حالىقارالىق تەاتر فەستيۆالى وتەتىنىن ءمالىم ەتتى, دەپ حابارلايدى Egemen.kz.
«ەكپە العان تۇرعىندار سانىنىڭ كوبەيۋى مەن كۆي-گە قارسى ۇجىمدىق يممۋنيتەتتىڭ قالىپتاسۋى قالىپتى ومىرگە بىرتىندەپ ورالۋعا مۇمكىندىك بەرەدى. سانيتارلىق نورمالاردى ساقتاي وتىرىپ, 28 قازان مەن 1 قاراشا ارالىعىندا Nur-Sultan theatre week حالىقارالىق تەاتر فەستيۆالىن وتكىزۋدى جوسپارلاپ وتىرمىز.
ەلوردامىزدىڭ بارلىق تەاترى قاتىسادى, سونداي-اق شەتەلدىك تەاتر ۇجىمدارى شاقىرىلادى», دەپ جازدى التاي كولگىنوۆ Instagram پاراقشاسىندا.
بۇل فەستيۆالدى وتكىزۋگە العاش رەت قالانىڭ بارلىق ينفراقۇرىلىمى, ونىڭ ىشىندە شاعىن جانە ورتا بيزنەس تارتىلادى.
تەاتر اپتالىعى كەزىندە كورمە, تەاتر ساحناسىنىڭ جەتەكشى تەاترلارى مەن مەترلەرىنىڭ ءتۇرلى شەبەرلىك ساباقتارى ۇيىمداستىرىلادى, سونداي-اق قالا تۇرعىندارى اراسىندا سپەكتاكلدەردىڭ قىزىقتى پرەمەرا قويىلىمدارىنا بيلەتتەر ويناتىلادى. تەاتر اپتالىعىن ۇيىمداستىرۋعا قاتىستى بارلىق اقپارات visitnursultan.kz سايتىندا ورنالاستىرىلادى.
«بىلتىر جاڭا قازاق دراما تەاترى اشىلدى, ساياباقتارى اباتتاندىرىلادى. سونداي-اق, «استانا وپەرا» تەاترىنىڭ قاسىندا ەمەن باعى, «استانا بالەت» تەاترى مەن ق.قۋانىشباەۆ اتىنداعى قازاق مۋزىكالىق دراما تەاترىنىڭ قاسىندا باق بولادى. بيىل جاستار سارايى مەن جاس كورەرمەننىڭ مۋزىكالىق تەاترىن جالعايتىن «تەاتر بۋلۆارى» جاياۋ جۇرگىنشىلەر اللەياسى, سونداي-اق ا.مامبەتوۆ كوشەسىنىڭ (كەنەسارى كوشەسى مەن اباي داڭعىلىنىڭ اراسىنداعى) ۋچاسكەسىندە ورنالاسقان «Demalys Promenade» العاشقى جاياۋ جۇرگىنشىلەر كوشەسى اشىلدى», دەدى ەلوردا اكىمى.