قر مەملەكەتتىك حاتشىسى قىرىمبەك كوشەرباەۆ ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ كەزەكتى وتىرىسىن وتكىزدى, دەپ حابارلايدى Egemen.kz akorda.kz-كە سىلتەمە جاساپ.
وتىرىستا ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ اقپاراتتىق جۇمىسى مەن عىلىمي-باسپا قىزمەتىنىڭ باسىمدىقتارى جانە كوميسسيانىڭ شەشىمدەرىن ىسكە اسىرۋ بارىسى تالقىلاندى. وتىرىستىڭ نەگىزگى سپيكەرلەرى رەتىندە ءبىلىم جانە عىلىم ءمينيسترى اسحات ايماعامبەتوۆ, مادەنيەت جانە سپورت ءمينيسترى اقتوتى رايىمقۇلوۆا, اقپارات جانە قوعامدىق دامۋ ۆيتسە-ءمينيسترى كەمەلبەك ويشىباەۆ, پارلامەنت ءماجىلىسىنىڭ دەپۋتاتى ايدوس سارىم ت.ب. ءسوز سويلەدى.
قىرىمبەك كوشەرباەۆ ءوز سوزىندە مەملەكەتتىك كوميسسيانىڭ قىزمەتىن اقپاراتتاندىرۋ ماسەلەسىندە عىلىمي نەگىزدىلىك پەن تاريحي وبەكتيۆتىلىكتى قامتاماسىز ەتۋ قاجەت ەكەنىن ەرەكشە اتاپ ءوتتى. سونىمەن قاتار مەملەكەتتىك كوميسسيا وتىرىسىندا ارحيۆتەردەن تابىلعان عىلىمي-زەرتتەۋ ەڭبەكتەردى جاھاندىق تسيفرلىق كىتاپحاناعا ەنگىزۋگە, كوركەم-پۋبليتسيستيكالىق شىعارمالاردى ىنتالاندىرۋ جونىندەگى ارنايى جوبالاردى ىسكە اسىرۋعا نازار اۋدارىلدى.
جيىن بارىسىندا وڭىرلەردەگى ساياسي قۋعىن-سۇرگىن تاريحىن زەرتتەۋ ماتەريالدارىن باسىپ شىعارۋ ءۇشىن مۇمكىندىكتەردى دامىتۋ جانە جاستار اۋديتورياسىنىڭ سۇرانىستارىنا باعىتتالعان اقپاراتتىق ورتا قالىپتاستىرۋ ماسەلەلەرى دە قارالدى.
وتىرىس قورىتىندىسى بويىنشا قر ۇكىمەتىنە, وڭىرلەردىڭ اكىمدەرىنە اقپاراتتىق جۇمىستا مەملەكەتتىك كوميسسيانىڭ ستراتەگيالىق باسىمدىقتارىن قامتاماسىز ەتۋگە, ءباسپاسوز جانە تسيفرلىق تەحنولوگيالاردىڭ كەڭ اۋقىمىن قولدانا وتىرىپ, كوميسسيانىڭ زەرتتەۋ ماتەريالدارى بويىنشا باسپا قىزمەتىن كەڭەيتۋگە باعىتتالعان تاپسىرمالار بەرىلدى.