ورتالىق كوممۋنيكاتسيالار قىزمەتى الاڭىندا وتكەن بريفينگتە ەگترم ەكولوگيالىق رەتتەۋ جانە باقىلاۋ كوميتەتىنىڭ توراعاسى زۇلفۇحار جولداسوۆ ەلدەگى اۋاسى لاس وڭىرلەردى اتادى, دەپ جازادى Egemen.kz.
ايتا كەتەيىك, پرەزيدەنت حالىققا جولداۋىندا ەلىمىزدەگى ەكولوگيالىق پروبلەمالارعا, اسىرەسە اۋا ساپاسىنا باسا نازار اۋدارۋدى تاپسىرعان بولاتىن.
زۇلفۇحار جولداسوۆتىڭ ايتۋىنشا ورتا مەرزىمدى پەرسپەكتيۆادا نەعۇرلىم لاستانعان 10 قالانى گازداندىرۋ جانە بالامالى ەنەرگيا كوزدەرىنە كوشىرۋ قاجەت.
«قازگيدرومەتتىڭ ەكولوگيالىق مونيتورينگىنىڭ ناتيجەلەرى بويىنشا 45 ونەركاسىپتىك قالا مەن مەگاپوليستىڭ 10 قالاسى اتموسفەرالىق اۋانىڭ جوعارى لاستانۋ دەڭگەيىنە جاتاتىنى كورسەتىلدى. بۇل نۇر-سۇلتان, الماتى, قاراعاندى, تەمىرتاۋ, اتىراۋ, اقتوبە, بالقاش, وسكەمەن, جەزقازعان جانە شىمكەنت قالالارى», دەدى كوميتەت توراعاسى.
ول رەسپۋبليكا قالالارىندا اتموسفەرالىق اۋانىڭ لاستانۋ سەبەپتەرىن ءۇش ساناتقا بولۋگە بولاتىنىن ايتتى.
«ماسەلەن, الماتى جانە نۇر-سۇلتان قالالارىندا لاستانۋدىڭ نەگىزگى پايىزى جىلۋ كوزدەرىنە, اۆتوكولىككە جانە جەكە سەكتورعا تيەسىلى. وسكەمەن جانە تەمىرتاۋ قالالارىندا ەميسسيالاردىڭ ەڭ كوپ كولەمى ونەركاسىپكە تيەسىلى. اقتوبە جانە اتىراۋ قالالارىندا ەسكىرگەن كارىزدىك-تازارتۋ قۇرىلىستارى جوعارى لاستانۋدىڭ سەبەبى بولىپ وتىر», دەيدى زۇلفۇحار جولداسوۆ.