شىعىس قازاقستان وبلىسىنىڭ اكىمى دانيال احمەتوۆ جەر قاتىناستارى جانە اۋىل شارۋاشىلىعى باسقارمالارىنىڭ باسشىلارىمەن وتكەن جينالىس بارىسىندا وبلىستا يگەرىلمەگەن 2,7 ملن گەكتار جەر مەملەكەتكە قايتارىلاتىنىن ايتتى, دەپ حابارلايدى Egemen.kz.
«بۇگىندە بوس جاتقان القاپتاردى قولدانىسقا جاراتۋ وتە ماڭىزدى. سەبەبى كوپتەگەن شارۋا قوجالىقتارى جايىلىمدىق جەرلەردىڭ تاپشىلىعىن سەزىنۋدە. قازىرگى تاڭدا جەردىڭ ءبىر بولىگىن بۇرىنعى مەنشىك يەلەرى ءوز ەركىمەن قايتارىپ بەردى. بارلىق قالالار مەن اۋدانداردىڭ اكىمدەرىنە تانىستىرىلعان ورتاق بەلگىلەنگەن الگوريتم بار», دەدى وبلىس اكىمى.
ونىڭ ايتۋىنشا, پايدالانىلماي جاتقان 2,7 ميلليون گەكتار جەر مەملەكەتكە قايتارىلۋى ءتيىس. وسىعان بايلانىستى تاعايىندالعان جۇمىستار گلۋبوكوە, اياگوز جانە زايسان اۋداندارىندا قارقىندى ءجۇرىپ جاتىر.
«ونىمدىلىگى تومەن جانە وسىمدىك شارۋاشىلىعى ءۇشىن ءتيىمسىز جەرلەردى جايىلىمعا بەرۋ ماسەلەسىن قاراستىرىپ جاتىرمىز. سونداي-اق 164 گەكتار جەردى بىرقاتار ەلدى مەكەندەردىڭ اكىمشىلىك شەكاراسىنا قوسۋ قاجەت. قالالار مەن اۋدانداردىڭ اكىمدەرىنە ءبىر اي ىشىندە مال جايىلىمىنا قاتىستى قيىندىقتاردى شەشۋدى تاپسىردىم», دەپ ناقتىلادى دانيال احمەتوۆ.