كەشە, 28 قاڭتار كۇنى قىزىلوردا قالالىق پروكۋراتۋراسىنىڭ قىزمەتكەرلەرى وبلىستىق ىشكى ىستەر دەپارتامەنتى اكىمشىلىك پوليتسياسىنىڭ وكىلدەرىمەن بىرگە وبلىس ورتالىعىنا جاقىن ماڭداعى اباي اۋىلىنان ۇيىنە اقبوكەن اتىپ اكەلگەن براكونەردى قۇرىقتادى. بۇل تۋرالى وبلىستىق پروكۋراتۋرانىڭ ءباسپاسوز قىزمەتى حابارلادى.
اتالمىش قۇقىق قورعاۋشىلار بىرلەسە جۇرگىزگەن رەيد بارىسىندا قىزىلوردا قالاسىنا قاراستى قوسشىڭىراۋ (اباي) اۋىلىنداعى ۇيلەردىڭ بىرىندەگى اۋلادان كيىك تۇقىمداس جانۋاردىڭ تەرىسىن تاپقان. بۇل دەرەك بويىنشا ولار قالا پروكۋرورى اتىنا قازاقستان قىزىل كىتابىنا ەنگەن اۋلاۋعا تىيىم سالىنعان كيىك تۇقىمداس جانۋاردىڭ زاڭسىز اۋلانعان دەنەلەرى بولۋى مۇمكىن ەكەندىگىن ەسكەرتە وتىرىپ, اتالعان ءۇيدىڭ اۋلاسىندا تەكسەرۋ جۇرگىزدى. تەكسەرۋ قورىتىندىسى اۋلاعا جاسىرىلعان 8 باس اقبوكەننىڭ ءولى دەنەسىن انىقتادى. ءۇي يەسى مۇنى 27 قاڭتاردىڭ كەشىندە قىزىلوردا-قۇمكول تاس جولىنىڭ 31-شاقىرىمىنان ءولى كيىكتەردىڭ دەنەسىنە كەزىگىپ, الا كەلگەنىمەن ءتۇسىندىردى.
قازىر جيناقتالعان فاكتىلەر بويىنشا قىلمىستىق كودەكستىڭ 290-بابىنا وراي پروتسەسسۋالدىق شەشىم قابىلدانعالى جاتىر.
قۇرىش نۇرىمبەت.
دەرەككوز: قىزىلوردا وبلىستىق پروكۋراتۋراسىنىڭ ءباسپاسوز قىزمەتى.