شىمكەنت قالاسىندا نىسانا كوزدەۋدەن ازيا بىرىنشىلىگى باستالدى. العاشقى جارىس كۇنىندە قازاقستان كومانداسى ءبىر التىن, ءبىر كۇمىس جۇلدە يەگەرى اتاندى, دەپ حابارلايدى Egemen.kz.
ەرەسەكتەر اراسىندا 10 مەترگە پنەۆماتيكالىق تاپانشامەن اتۋ جاتتىعۋىندا 235.1 ۇپايدى ەنشىلەگەن قازاقستاندىق ەلدار يمانقۇلوۆ جەڭىسكە جەتتى. ەكىنشى ورىندى ساۋد ارابياسىنىڭ وكىلى سوفار موحاممماد الدوساري يەلەنسە, تايلاندتىق نوپپادون سۋتۆيرۋح ءۇشىنشى ورىندا تۇراقتادى.
جاستار اراسىندا تاپانشامەن 10 مەترگە نىسانا كوزدەۋدەن تاعى ءبىر قازاقستاندىق ياروسلاۆ ماحنەۆ كۇمىس جۇلدەگە يە بولدى. بۇل باسەكەدە التىن جۇلدەنى وزبەكستاندىق ۋميدبەك كامالبەكوۆ, قولانى تاعى ءبىر وزبەك مەرگەنى مۇحامماد كامالوۆ ەنشىلەدى. ال ءجاسوسپىرىم اراسىندا وزبەكستاندىق يلحومبەك وبيدجونوۆ جەڭىمپاز اتاندى.
العاشقى كۇننىڭ قورىتىندىسى بويىنشا قازاقستان قۇراماسى ازىرگە 1 التىن مەن 1 كۇمىس جۇلدە يەلەندى.
ايتا كەتسەك, نىسانا كوزدەۋدەن ازيا چەمپيوناتى وسىمەن 14-ءشى رەت ۇيىمداستىرىلىپ وتىر. قۇرلىق دوداسى 20 قىركۇيەككە دەيىن جالعاسادى.