بۇل كۇندەرى ونلاين فورماتتا ءوتىپ جاتقان شاحماتشىلار وليمپياداسىندا جەرلەستەرىمىز الداعى شيرەك فينالدىق سايىستا اقش كومانداسىمەن شەبەرلىك بايقاساتىن بولدى.
ايتۋلى جارىستىڭ العاشقى كەزەڭىندە قازاقستان قۇراماسى كەرەمەت ونەر كورسەتىپ, ءوز توبىندا ءبىرىنشى ورىندى ولجالاعان ەدى. اسىرەسە, ءبىز جانسايا ابدىمالىكتىڭ اسقان شەبەرلىگىنە ءتانتى بولدىق. قىتاي قۇراماسىنا قارسى باسەكەدە ول ايەلدەر رەيتينگىندە كوش باستاپ تۇرعان الەمنىڭ ءتورت دۇركىن چەمپيونى حوۋ يفانگە سان سوقتىردى. ال ءبيبىسارا اساۋباەۆا ءوزىنىڭ جەتى كەزدەسۋىنىڭ بارلىعىندا جەڭىسكە جەتتى.
ەندى 13-قىركۇيەكتە باستالاتىن شيرەك فينالدىق سايىستا اسا ازۋلى امەريكالىق شاحماتشىلارمەن كۇش سىناسامىز. وسى ماجەدەگى وزگە باسەكەلەر ۋكراينا مەن ءۇندىستان, رەسەي مەن ماجارستان جانە قىتاي مەن پولشا قۇرامالارى اراسىندا وتەدى. كەلەسى كۇنى جارتىلاي فينالدىق ويىندار وتسە, وسى وليمپيادانىڭ جەڭىمپازى 15-قىركۇيەكتە انىقتالادى.
ەستەرىڭىزگە سالا كەتەيىك, بۇل جارىستا قازاق ەلى نامىسىن رينات جۇماباەۆ, دەنيس ماحنەۆ, جانسايا ابدىمالىك, دينارا سادۋاقاسوۆا, رامازان جالماحانوۆ جانە ءبيبىسارا اساۋباەۆا سىندى شەبەرلەر قورعاۋدا. ال قوسالقى قۇرامدا رۋستام حۋسنۋتدينوۆ, مۇرتاس قاجىعالەەۆ, گ ۇلىسحان ناقباەۆا, گۇلميرا داۋلەتوۆا, قازىبەك نوگەربەك جانە مەرۋەرت كاماليدەنوۆا ويناۋدا.