پانفيلوۆ وتريادىنىڭ سوڭعى ساربازدارىنىڭ ءبىرى قايىرلى جونقاباەۆ 10 قىركۇيەكتە ءوزىنىڭ عاسىرلىق تۋعان كۇنىن اتاپ وتەدى, دەپ حابارلايدى Egemen.kz.
سالتاناتتى شاراعا گارنيزوننىڭ, قالانىڭ قورعانىس ىستەرى جونىندەگى دەپارتامەنتىنىڭ اسكەري قىزمەتشىلەرى, راديوەلەكترونيكا جانە بايلانىس اسكەري ينستيتۋتىنىڭ كۋرسانتتارى, قالالىق اكىمدىك پەن ارداگەرلەر كەڭەسىنىڭ وكىلدەرى قاتىستى. تۋعان كۇن يەسىنە قازاقستان رەسپۋبليكاسى قورعانىس ءمينيسترىنىڭ اتىنان قۇتتىقتاۋ حاتى تابىس ەتىلدى.
راديوەلەكترونيكا جانە بايلانىس اسكەري ينستيتۋتى وركەسترىنىڭ سۇيەمەلدەۋىمەن كۋرسانتتار مەن دەسانتشىلار سالتاناتتى مارشپەن ءوتتى.
«اسپانىمىز بەيبىت بولۋى ءۇشىن ولاردىڭ قانداي ۇلكەن ۇلەس قوسقانىن ەشقاشان ۇمىتپاۋىمىز كەرەك», دەدى الماتى قالاسى بويىنشا ارداگەرلەر كەڭەسىنىڭ توراعاسى مەليس شامپيەۆ.
قايىرلى جونقاباەۆتىڭ ءۇيىنىڭ جانىندا دا مۋزىكامەن قارسى الدى. قر ۇلتتىق ۇلانىنىڭ 5571 اسكەري ءبولىمىنىڭ وركەسترى اسكەري جىلداردىڭ مارشتارى مەن اندەرىن ورىندادى.
قايىرلى جونقاباەۆ ۇزاق ءومىر ءسۇرۋ قۇپياسىمەن ءبولىستى.
«اتا-انام ماعان جاقسى تاربيە بەردى. مەن سپورتپەن اينالىستىم, جامان ادەتتەرىم بولمادى. ۇيلەنگەننەن كەيىن بەس بالا تاربيەلەپ وسىردىك, ولاردىڭ ارقايسىسى جوعارى ءبىلىم الدى. قازىر بالالارىمنىڭ, نەمەرەلەرىمنىڭ جانە شوبەرەلەرىمنىڭ اراسىندا باقىتتى ءومىر سۇرەمىن, ولار ماعان جاقسى كۇتىم جاسايدى. سوندىقتان ودان دا ۇزاق ءومىر سۇرگىم كەلەدى», دەيدى ول.
ارداگەر 1921 جىلى 10 قىركۇيەكتە شىعىس قازاقستان وبلىسى سامار اۋدانىندا دۇنيەگە كەلگەن. ول 1941 جىلدىڭ قىركۇيەگىندە پانفيلوۆ ديۆيزياسىنىڭ 23 گۆارديالىق پولكىنىڭ قاتارىنا مايدانعا شاقىرىلدى. قايىرلى جونقاباەۆ سوعىستىڭ ءار كۇنىن كورىپ ءوتتى.
ول 8 گۆارديالىق اتقىشتار ديۆيزياسى قۇرامىندا بەلارۋس, پولشا جانە ەستونيانى ازات ەتۋگە قاتىستى, كەڭەس وداعىنىڭ باتىرى مالىك عابدۋللينمەن ءبىر روتادا قىزمەت ەتتى. 1943 جىلى اقپاندا رجەۆ شايقاسىندا جاراقات الدى. جەڭىستى درەزدەندە قارسى الدى.
ۇلى وتان سوعىسى جىلدارىندا مايدانگەر كورسەتكەن ەرلىگى مەن باتىلدىعى ءۇشىن ول «قىزىل جۇلدىز» جانە «وتان سوعىسى» وردەندەرىمەن, «ەرلىگى ءۇشىن» جانە «ماسكەۋدى قورعاعانى ءۇشىن» مەدالدارىمەن ماراپاتتالدى.
سوعىس اياقتالعاننان كەيىن ول سامار اۋداندىق اتقارۋ كوميتەتىنىڭ جالپى ءبولىمىنىڭ مەڭگەرۋشىسى بولىپ جۇمىس ىستەدى, اۋداندىق تۇتىنۋشىلار وداعى جۇيەسىندە باسشىلىق لاۋازىمداردى اتقاردى, سونداي-اق الماتىداعى قوعامدىق تاماقتانۋ جۇيەسىندە شارۋاشىلىق ەسەپتىڭ ديرەكتورى بولدى.
1983 جىلى قايىرلى جونقاباەۆ زەينەتكە شىقتى. ول بەس بالاسىن, 10 نەمەرەسى مەن 13 شوبەرەسىن جەتىلدىردى.
ۇلى جەڭىس كۇنىنەن 75 جىلدان استام ۋاقىت وتسە دە, وتانىمىزدى فاشيستىك گەرمانيادان قورعاعان ەرلىك ۇمىتىلمايدى.