«بايقوڭىر» كۇزگى ۇشىرۋعا بەلسەندى دايىندىق جۇرگىزۋدە

2021 جىلعى 14 قىركۇيەكتە بايقوڭىر عارىش ايلاعىنىڭ «ۆوستوك» ۇشىرۋ كەشەنىنەن «سويۋز-2.1ب» زىمىران-تاسىعىشى ۇشىرىلادى. ول OneWeb ەۋروپالىق تومەن وربيتالىق سپۋتنيكتەرىنىڭ كەزەكتى پارتياسىن وربيتاعا شىعارۋعا ءتيىس. One Web سپۋتنيكتەرىنىڭ الدىڭعى توپتاماسى بايقوڭىردان 2021 جىلدىڭ 22 تامىزىندا ءساتتى ۇشىرىلدى.

روسكوسموس ءباسپاسوز قىزمەتىنىڭ مالىمەتىنشە, 2021 جىلعى 7 قىركۇيەكتە باس اعىتقىشتىڭ استىنداعى «فرەگات» ۇدەتكىش بلوگىنا ورناتىلعان 34 عارىش اپپاراتتارىنىڭ جيىنتىعى № 31 الاڭعا تاسىمالداندى, وندا عارىشتىق باس بولىگى زىمىراننىڭ ءۇشىنشى ساتىسىمەن تۇيىسەتىن بولادى.

بايقوڭىر عارىش ايلاعىنىڭ 254-ءشى الاڭىنىڭ ۆاكۋمدىق كامەراسىندا 2021 جىلعى 5 قازاندا حالىقارالىق عارىش ستانتسياسىنا (حعس) 66-شى نەگىزگى ەكسپەديتسياعا قاتىسۋشىلاردى جەتكىزۋگە ارنالعان «سويۋز مس-19» كولىكتىك باسقارىلاتىن كەمەسىنىڭ پنەۆموۆاكۋمدىق سىناقتارى جۇرگىزىلۋدە.

سونداي-اق, بايقوڭىر عارىش ايلاعىنىڭ № 254 الاڭىنىڭ مونتاجداۋ-سىناۋ كورپۋسىندا «پروگرەسس مس-18» كولىكتىك جۇك كەمەسىن سىناۋدىڭ قورىتىندى كەزەڭى باستالدى, ونى حالىقارالىق عارىش ستانتسياسىن جابدىقتاۋدىڭ 79-شى ميسسياسىنىڭ باعدارلاماسى بويىنشا ۇشىرۋ 2021 جىلعى قازان ايىنىڭ سوڭىنا جوسپارلانعان.