سەنات توراعاسى قاسىم-جومارت توقاەۆقا پارلامەنت سەناتىنىڭ VII سەسسياسى بارىسىندا اتقارىلاتىن جۇمىس جوسپارى تۋرالى باياندادى, دەپ حابارلايدى Egemen.kz اقورداعا سىلتەمە جاساپ.
كەزدەسۋ بارىسىندا پرەزيدەنتتىڭ جولداۋى مەن بەرگەن تاپسىرمالارىن ىسكە اسىرۋعا باعىتتالعان بىرقاتار زاڭ توپتاماسىنىڭ ازىرلەنىپ جاتقانى جونىندە مالىمەت بەرىلدى.
پارلامەنتتىڭ جوعارعى پالاتاسىنىڭ توراعاسى الداعى سەسسيا اياسىندا سەناتورلار ۇكىمەتپەن جانە ءماجىلىس دەپۋتاتتارىمەن بىرلەسىپ, ايەلدەر مەن جاستار ءۇشىن 30 پايىزدىق كۆوتانى بەكىتۋ بولىگىندە سايلاۋ زاڭناماسىن وزگەرتۋ بويىنشا جۇمىس ىستەيتىن بولادى دەپ حابارلادى.
سونىمەن قاتار, «الەۋمەتتىك كودەكس», «ونەركاسىپ ساياساتى تۋرالى», «كاسىبي بىلىكتىلىك تۋرالى», «جەكە قوسالقى شارۋاشىلىقتار تۋرالى» جانە باسقا دا زاڭدارعا وزگەرتۋلەر مەن تولىقتىرۋلار ەنگىزۋ مىندەتى تۇر.
ماۋلەن اشىمباەۆتىڭ ايتۋىنشا, سەنات دەپۋتاتتارى مەملەكەت باسشىسىنىڭ تاپسىرمالارىن ورىنداۋعا باعىتتالعان بىرقاتار باستاماشىل زاڭ جوبالارىن دايىندادى. اتاپ ايتقاندا, «ادام قۇقىقتارى جونىندەگى ۋاكىل تۋرالى» زاڭ جوباسى جوسپارلانۋدا, سونىمەن قاتار عىلىمي كادرلاردىڭ جاعدايىن جاقسارتۋ جانە ولاردىڭ الەۋمەتتىك قورعالۋ كەپىلدىكتەرى تۋرالى زاڭناماسىنا, سالىق كودەكسىنە وزگەرتۋلەر ەنگىزۋ كوزدەلۋدە. سونداي-اق جايىلىمدىق جەرلەردى باسقارۋدى جانە پايدالانۋدى رەتتەيتىن بىرقاتار تۇزەتۋلەر ازىرلەنۋ ۇستىندە.
قاسىم-جومارت توقاەۆ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا قابىلداناتىن زاڭ جوبالارىنىڭ بارلىق نورمالارىن تالقىلاۋ جانە پىسىقتاۋ پروتسەسىنە ازاماتتىق قوعام مەن ساراپشىلاردى كەڭىنەن تارتۋ قاجەتتىگىن اتاپ ءوتتى.
كەزدەسۋ سوڭىندا پرەزيدەنت پارلامەنتتىك ديپلوماتيانىڭ الەۋەتىن ودان ءارى ىسكە اسىرۋعا قاتىستى بىرقاتار مىندەتتەر قويدى.
سونداي-اق, مەملەكەت باسشىسى 2022 جىلى الەمدىك جانە ءداستۇرلى دىندەر كوشباسشىلارىنىڭ VII سەزىنە دايىندىقتى باستاۋ تۋرالى تاپسىرما بەردى.