اقتوبەنىڭ ىرگەسىندەگى اقجار اۋىلىنىڭ تۇرعىندارى جارىلعىش زات ساقتالعان قويمانى كوشىرۋدى تالاپ ەتتى. سەبەبى قاۋىپتى ايماق ۇيلەرىنە قولسوزىم جەردە ورنالاسقان. تۇرعىندار جامبىلداعىداي جاعداي قايتالانسا, تۇگىمىز قالمايدى دەپ ۇرەيلەنىپ وتىر, دەپ حابارلايدى Egemen.kz.
بۇل تۋرالى كتك تەلەارناسى مالىمدەدى.
تەلەارنا مالىمەتىنشە, قۇزىرلى ورگان وكىلدەرى قويمالاردان ەش قاۋىپ جوعىن ايتقان. بىراق ول جەردە جارىلعىش زاتتىڭ بارىن جاسىرمايدى. ال قاۋىپتى ايماق پەن اۋىل اراسى نەبارى 150-200 مەتر.
«ۇرەيدەمىز. ارىستا, تارازدا بولعان وقيعا تاعى قايتالانسا, سان سوعىپ قالامىز. ىشىندە بۇرىننان قالعان جارىلعىش زاتتار بولۋى مۇمكىن. تروتيل بولسا, سونىڭ ءوزى دە جەتەدى. ول مەرزىمى وتكەننەن كەيىن وزىنەن-ءوزى اتىلادى», دەيدى اقجار اۋىلىنىڭ تۇرعىنى جاردەم قازتۋعانوۆ.
تۇرعىندار ۇيلەرىنىڭ ىرگەسىندە جارىلعىش زاتتىڭ ساقتالعانىن قالامايدى. سوندىقتان تەكسەرىپ قانا قويماي, قويمانى تولىق كوشىرسىن دەپ تالاپ قويىپ وتىر.
تىكەنەك سىممەن قورشالعان اۋماق اقجار اۋىلىنىڭ ىرگەسىنە ءتيىپ تۇر. قورشاۋدان ارى قاراي ءوتۋ قاۋىپتى ەكەنى تۋرالى ءار جەرگە ەسكەرتۋ تاقشايلارى ىلىنگەن. ال ايماق «كازپرومگەوفيزيكا» اق-نا تيەسىلى.
قۇزىرلى ورگان وكىلدەرىنىڭ سوزىنشە, قويماعا بىلتىر تەكسەرۋ جۇرگىزىلگەن. قويمادا اسكەري وق-ءدارى ەمەس, وندىرىستىك جارىلعىش زات ساقتالادى ەكەن. ونى مۇناي-گاز كەن ورىندارىنا قولدانادى.
«بۇل قورعانىس مينيسترلىگىنە قارايتىن نىسان ەمەس. ءبىر زاريادتىڭ كولەمى ەكى جارىم توننا بولسا دا, اۋىلعا قاۋىپ توندىرمەيدى. كۇزەتى بار. قاۋىپسىزدىك شارالارىن ساقتاسا, ەش قاۋىپ بولمايدى. مۇندا وندىرىستىك جارىلعىش زاتتار عانا بار», دەيدى اقتوبە وبلىسى وندىرىستىك قاۋىپسىزدىك دەپارتامەنتى باسشىسىنىڭ ورىنباسارى سامات تاجداۋلەتوۆ.
قويما 1960 جىلدان بەرى بار. كەزىندە قاۋىپسىزدىك كوميتەتىندەگىلەر اكىمدىككە بۇل ماڭنان ءۇي سالۋعا ەشقانداي جەر بەرمەۋ تۋرالى ءوتىنىش تە ايتقان ەكەن. بىراق ونى ەشكىم ەلەمەگەن. ال ەندى قويمانى كوشىرۋ تۋرالى شەشىم قابىلداۋعا ويلانىپ وتىر.