ەلىمىزدە عىلىممەن اينالىساتىن مامانداردىڭ سانى ارتپاق. ناقتى ايتقاندا, 2025 جىلى وتاندىق عالىمداردىڭ سانىن 32 مىڭعا جەتكىزۋ جوسپارلانىپ وتىر. بۇل تۋرالى قر ءبىلىم جانە عىلىم مينيسترلىگى عىلىم كوميتەتىنىڭ توراعاسى جاننا قۇرمانعاليەۆا ءمالىم ەتتى, دەپ حابارلايدى Egemen.kz.
«بىزدەگى كۇردەلى ماسەلەلەردىڭ ءبىرى – عالىمدار سانىنىڭ كۇرت ازايۋى. قازىرگى تاڭدا ەلىمىزدە عىلىم سالاسىندا ەڭبەك ەتۋشىلەردىڭ سانى 22 مىڭنان ءسال عانا اسادى.
وسى ورايدا ۇلتتىق جوبا اياسىندا 2025 جىلى ەلىمىزدەگى عالىمدار سانىن كوبەيتۋدى ياعني كەمىندە 34 مىڭعا جەتكىزۋدى كوزدەپ وتىرمىز. الدىمەن عىلىم سالاسىن قارجىلاندىرۋعا قاتىستى ماسەلەنى رەتتەپ الۋ كەرەك. بۇل ماسەلەنى سوڭعى 2 جىلدا ەرەكشە نازار الىپ كەلەمىز. سونىڭ ناتيجەسىندە 2020-2021 جىلى عىلىمعا بولىنەتىن قارجى كولەمى 2 ەسەگە ارتتى. جانە وتاندىق عىلىم سالاسىنا بولىنەتىن قارجىعا تەك ءبىزدىڭ مينيسترلىك قانا ەمەس, ودان بولەك 9 ورتالىق مەملەكەتتىك ورگان جاۋاپتى», دەدى جاننا قۇرمانعاليەۆا وكق-دە وتكەن ءباسپاسوز ءماسليحاتىندا.
كوميتەت باسشىسىنىڭ سوزىنە سەنسەك, بيىل عىلىم سالاسىنا 83 ملرد تەڭگەدەن استام قارجى ءبولىندى.
«سول قارجىعا ءبىزدىڭ كوميتەت عالىمدارعا ارنالعان 5 گرانتتىق جانە 2 باعدارلامالىق بايقاۋ جاريالادى. قازىرگى تاڭدا ەلىمىزدە 1164 عىلىمي جوبا قارجىلاندىرىلىپ جاتىر. ودان بولەك, مەملەكەت باسشىسىنىڭ تاپسىرماسىنا سايكەس 2 رەت جاس عالىمدارعا ارنالعان كونكۋرس ۇيىمداستىرىلدى. سونىڭ ناتيجەسىندە 315 عىلىمي جوبا ىسكە اسىرىلدى. بۇگىندە ەلىمىزدە 2 مىڭنان استام جاس ماماندار عىلىممەن اينالىسىپ جاتىر», دەيدى ول.