ءماجىلىس سپيكەرى نۇرلان نىعماتۋليننىڭ توراعالىعىمەن پالاتا بيۋروسى ءوتىپ, وندا الداعى جالپى وتىرىستىڭ كۇن ءتارتىبى ناقتىلاندى, دەپ حابارلادى ءماجىلىستىڭ ءباسپاسوز قىزمەتى.
بيۋرو وتىرىسىندا دەپۋتاتتار قاراۋىنا كاسپي تەڭىزىنىڭ تەڭىز ورتاسىن قورعاۋ جونىندەگى نەگىزدەمەلىك كونۆەنتسياعا قورشاعان ورتاعا ترانسشەكارالىق تۇرعىدان جاسالاتىن اسەردى باعالاۋ جونىندەگى حاتتامانى راتيفيكاتسيالاۋ تۋرالى زاڭ جوباسى ۇسىنىلدى.
حاتتاما تەڭىز ورتاسى مەن تەڭىزدىڭ جاقىندىعى اسەرىنە ۇشىراپ وتىرعان قۇرلىقتىڭ لاستانۋىن بولدىرماۋ, تەڭىزدىڭ جاقىندىعى اسەرىنە ۇشىراپ وتىرعان قۇرلىققا ەلەۋلى ترانسشەكارالىق اسەر ەتۋى مۇمكىن جوسپارلانىپ وتىرعان قىزمەتتىڭ قورشاعان ورتاعا اسەرىن باعالاۋدىڭ ءتيىمدى جانە اشىق راسىمدەرىن جۇرگىزۋدى كوزدەيدى.
كۇن ءتارتىبىنىڭ جوباسىندا قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا زاڭ جوباسىن جۇمىسقا الۋ قاراستىرىلعان. سونىمەن قاتار پالاتانىڭ بەيىندى كوميتەتتەرى بىرقاتار جاڭا راتيفيكاتسيالاناتىن زاڭ جوبالارىن جۇمىسقا الماق. اتاپ ايتقاندا, مۇگەدەكتەردىڭ قۇقىقتارى تۋرالى كونۆەنتسياعا فاكۋلتاتيۆتىك حاتتامانى جانە قازاقستان مەن رەسەي ۇكىمەتتەرى اراسىنداعى «بايقوڭىر» عارىش ايلاعىندا «بايتەرەك» عارىش زىمىران كەشەنiن قۇرۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوبالارى بار.