اقمولا وبلىسىنداعى بۋراباي اۋدانىنىڭ زەلەنىي بور اۋىلىنداعى قۇس فابريكاسىندا تاۋىقتار اشتان قىرىلىپ جاتىر. جالاقىنىڭ ۇنەمى كەشىگۋىنە بايلانىستى قىزمەتكەرلەر دە كۇنىن ارەڭ كورىپ وتىرعانىن ايتادى, دەپ جازادى Egemen.kz.
كتك ارناسىنىڭ حابارلاۋىنشا, قۇستارعا جەم ەكى اپتادا ءبىر رەت بەرىلەدى. اشتىقتان كۇنىنە ءۇش مىڭعا دەيىن تاۋىق ولەدى. ەندى قىزمەتكەرلەردىڭ جالعىز مىندەتى - ولگەن قۇستاردى تورلاردان شىعارۋ.
«مەندە 50 مىڭ تاۋىق بولعان. ەندى تەك 6 900 عانا قالدى. بۇل - وتە قورقىنىشتى. كۇن سايىن ءولىپ جاتىر», دەيدى ءبىر قۇس شارۋاشىلىعىنىڭ يەسى.
قۇس فابريكاسىنىڭ قىزمەتكەرلەرىنە دە اشتىق قاۋپى ءتونىپ تۇر. مۇندا جالاقى 50 مىڭنان از جانە ەكىنشى ايعا كەشىكتىرىلگەن.
«بەس جىل بويى ءبىز جالاقىمىزدى ۋاقىتىندا المايمىز, ۇنەمى جالىنۋعا ءماجبۇرمىز. اقشامىز جەم الۋعا دا جەتپەيدى. سونىمەن قاتار زەينەتاقى شوتىمىزعا, مەدساقتاندىرۋعا دا ەشتەڭە اۋدارمايدى», دەيدى سۇرىپتاۋشى يرينا بوروليس.
كەزىندەگى ءىرى قۇس فابريكاسى قازىر ءوڭىردى جۇمىرتقامەن دە, ەتپەن دە قامتاماسىز ەتۋدى الدەقاشان توقتاتقان. باسشىلىقتىڭ ايتۋىنشا, ماسەلە قىستا قۇست جەمى قىمباتتاعان كەزدە باستالعان. سودان كەيىن باسەكەلەستەر نارىققا شىققان. ەندى كومپانيا بانكروت بولۋدىڭ الدىندا تۇر.
«باسىندا مايلى داقىل جەتىسپەدى. سودان كەيىن پرەزيدەنت ەكسپورتقا تىيىم سالدى. سونداي-اق نارىقتا رەسەي جۇمىرتقاسى كوپ. قازاقستاندىق جۇمىرتقانىڭ باعاسى تومەندەپ كەتتى», دەيدى «اگرو-ينۆەست» جشس باسقارۋشى ديرەكتورى اسقار اقىلبەكوۆ.
كاسىپورىن باسشىلارى ءتىرى قالعان قۇستاردى ساتۋدى جوسپارلاپ وتىر. تابىس جالاقى بويىنشا بەرەشەكتى جابادى. زاۋىتتىڭ ءوزى ءۇش ايعا جابىلاتىن بولدى.