ماقسات – جولداۋداعى باستامالاردى ساپالى زاڭدارمەن قامتاماسىز ەتۋ

كۇن تارتىبىندەگى ماسەلەگە كىرىسپەس بۇرىن ءماجىلىس توراعاسى دەپۋتاتتىق كورپۋستىڭ نازارىن مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا ايتىلعان باسىمدىقتارعا اۋداردى.

– مەملەكەت باسشىسى قاسىم-جومارت كەمەل­ ۇلى توقاەۆتىڭ بۇگىنگى جولداۋى – قازاق­ستانى­مىزدىڭ تۇراقتىلىعىن ساقتاي وتىرىپ, ەلدى ودان ءارى دامىتۋعا ارنالعان ستراتەگيالىق قۇجات. سەبەبى جولداۋدا ساياسي, الەۋمەتتىك, ەكونوميكالىق ءوسىپ-وركەندەۋدىڭ ناقتى جولدارى, ناقتى قادامدارى كورسەتىلدى. ونىڭ ىشىندە, اسىرەسە, اگروونەركاسىپ, دەنساۋلىق, ءبىلىم, اي­ماقتار دامۋى جانە باسقا دا باعىتتاردى نى­عاي­تۋعا ەرەكشە كوڭىل ءبولىنىپ وتىر. ال ءبىزدىڭ دەپۋتاتتىق كورپۋستىڭ ەندىگى باستى ماق­ساتى – ول وسى بارلىق باستامالاردى ساپالى زاڭ­دارمەن قامتاماسىز ەتۋ, – دەدى نۇرلان نىعماتۋلين.

Cونىمەن قاتار ءماجىلىس توراعاسى بيۋد­جەت-قارجى جۇيەسىن جاقسارتۋ, ەلدى ساياسي جاڭعىر­تۋدى جالعاستىرۋ سياقتى مىندەتتەرگە دە نازار اۋداردى. وسى تاپسىرمالاردىڭ بارلىعى پارلامەنتتىڭ الداعى كەزەڭدەگى زاڭ شىعارۋ جۇمىسى ءۇشىن دە ايقىن باعىت بەرگەنىن اتاپ ءوتتى. قازاقستان پرەزي­دەنتىنىڭ جولداۋىندا بەلگىلەنگەن ەلدى جۇيەلى جاڭعىرتۋ ءۇشىن مىقتى زاڭنامالىق بازانى ساپالى جانە جەدەل قۇرۋ قاجەتتىگىنە توقتالدى.

ءماجىلىس سپيكەرى دەپۋتاتتار قاراۋىنداعى زاڭ جوبالارى تۋرالى ايتا كەلىپ, قازىر پالاتا­دا قارالىپ جاتقان ونەركاسىپتىك ساياسات تۋرالى زاڭ جوباسىنا, ەل پرەزيدەنتى ازىرلەپ, قابىل­داۋدى تاپ­سىرعان اگلومەراتسيانى دامىتۋ, كاسىبي بىلىك­تىلىك تۋرالى زاڭ جوبالارىنا دا نازار اۋداردى.

نۇرلان نىعماتۋلين دەپۋتاتتار الدىندا الەۋمەتتىك كودەكس جوباسىمەن جۇمىس تۇر­عانىنا نازار اۋداردى. وسى جانە باسقا دا زاڭ جوبالارى بويىنشا بارلىق جۇمىس, ادەتتەگىدەي, اشىق جانە ترانسپارەنتتى تۇردە جۇرگىزىلەتىنىن, ول ازاماتتىق قوعام, بۇقارالىق اقپارات قۇرالدارى وكىلدەرىنىڭ بەلسەندى تۇردە قاتىسۋىمەن وتكىزىلەتىنىن اتاپ ءوتتى.

جالپى وتىرىستا پالاتا كوميتەتتەرى قورى­تىندى ازىرلەۋ ءۇشىن بىرقاتار جاڭا زاڭ جو­باسىن جۇمىسقا الدى. ولار: ۇلتتىق قوردان 2022-2024 جىلدارعا ارنالعان كەپىلدەندىرىلگەن ترانس­فەرت تۋرالى, 2022-2024 جىلدارعا ارنالعان رەسپۋبليكالىق بيۋدجەت تۋرالى زاڭ جوبالارى.

سونداي-اق تاۋەلسىزدىكتىڭ 30 جىلدىعىنا بايلانىستى راقىمشىلىق جاساۋ تۋرالى زاڭ جوباسى دا جۇمىسقا الىندى.

– بۇل زاڭ جوباسى مەملەكەت باسشىسىنىڭ 2020 جىلعى 29 قازانداعى تاپسىرماسىن ورىن­داۋ ماقساتىندا ازىرلەندى. زاڭ جوباسى قازاق­ستان رەسپۋبليكاسى تاۋەلسىزدىگىنىڭ 30 جىل­دىعىنا وراي ىزگىلىك قاعيداتى نەگىزىندە قىل­مىستىق اتقارۋ جۇيەسى مەكەمەلەرىندە ۇستا­لاتىن جانە پروباتسيا قىزمەتىنىڭ ەسەبىندە تۇرعان ادامداردى جازادان ءارى قىلمىستىق جاۋاپتىلىقتان بوساتۋعا, جازانىڭ وتەلمەگەن بولى­گىن قىسقارتۋعا باعىتتالعان, – دەدى ءماجى­لىس­تىڭ زاڭناما جانە سوت-قۇقىقتىق رەفورما كوميتەتىنىڭ توراعاسى ارمان قوجاحمەتوۆ.

ونىڭ ايتۋىنشا, قوعام جانە مەملەكەتتىڭ قاۋىپ­سىزدىگىنە ەلەۋلى قاتەر توندىرمەيتىن قىل­مىس­تار جاساعانى ءۇشىن سوتتالعان ادامداردى, ونىڭ ىشىندە الەۋمەتتىك وسال توپ ساناتىنداعى ەل ازا­ماتتارىن جازادان بوساتۋعا مۇمكىندىك بەرەدى.

سونىمەن قاتار قىلمىستىق كودەكسكە ءولىم جازاسى ماسەلەلەرى بويىنشا تۇزەتۋلەر ەنگىزۋ تۋرالى, قۇقىق قورعاۋ قىزمەتىن وتكەرۋ ءتارتىبىن جەتىلدىرۋ, سىبايلاس جەمقورلىققا قارسى ءىس-قيمىل ماسەلەلەرىنە قاتىستى وزگەرىستەر مەن تولىقتىرۋلار ەنگىزۋ تۋرالى زاڭ جوبالارى بويىنشا قورىتىندى ازىرلەنەدى.

قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى جانە وعان ىلەسپە زاڭ جوبالارى, باسەكەلەستىكتى دامىتۋ ماسەلەلەرى بويىنشا جانە كولىك ماسەلەلەرى تۋرالى جاڭا زاڭ جوبالارىن دا پالاتا كوميتەتتەرى جۇمىسقا الدى.

جۇمىسقا الىنعان جاڭا زاڭ جوبا­لارى­نىڭ قاتارىندا بىرقاتار راتيفيكاتسيالىق قۇجات بار. اتاپ ايتقاندا, دەربەس دەرەكتەر الماسۋ سالاسىنداعى اكىمشىلىك ماسەلەلەر بويىنشا ءوزارا قۇقىقتىق كومەك تۋرالى, ەۋرازيالىق ەكونوميكالىق كوميسسيانىڭ باسەكەلەستىكتىڭ بىرىڭعاي قاعيدالارىنىڭ ساقتالۋىن باقىلاۋ جونىندەگى وكىلەتتىكتەردى جۇزەگە اسىرۋى كەزىن­دە قۇپيا اقپاراتتى قورعاۋ ءتارتىبى جانە ونى جاريا ەتكەنى ءۇشىن جاۋاپتىلىق تۋرالى كە­لىسىمگە وزگەرىستەر ەنگىزۋ تۋرالى حاتتاما, قازاقستان مەن قىرعىزستان جانە تاجىك­ستان ۇكىمەتتەرى اراسىنداعى وتەۋسىز اسكەري-تەحنيكالىق كومەك كورسەتۋ تۋرالى كەلىسىمدەردى جانە تاۋەلسىز مەم­لەكەتتەر دوستاستىعىنا قاتىسۋشى مەملەكەتتەر قارۋلى كۇشتەرىنىڭ بىرلەسكەن گۋمانيتارلىق ميناسىزداندىرۋ ينجەنەرلىك بولىمشەسى تۋرالى كەلىسىمدى راتيفيكاتسيالاۋ جوسپارلانىپ وتىر.

بۇدان بولەك, قارالاتىن قۇجاتتار قا­تارىندا كاسپي تەڭىزىنىڭ تەڭىز ورتاسىن قورعاۋ جونىندەگى نەگىزدەمەلىك كونۆەنتسياعا كاس­پي تەڭىزىن جەرۇستى كوزدەرىنەن جانە قۇر­لىقتا جۇزەگە اسىرىلاتىن قىزمەت ناتيجەسىندە لاستانۋدان قورعاۋ جونىن­دەگى جانە كاسپي تەڭىزىنىڭ تەڭىز ورتاسىن قور­عاۋ جونىندەگى نەگىزدەمەلىك كونۆەنتسياعا بيولو­گيا­لىق ارالۋاندىلىقتى ساقتاۋ تۋرالى حاتتا­ما­لاردى راتيفيكاتسيالاۋ تۋرالى زاڭ جوبالارى بار.

وتىرىس سوڭىندا ءماجىلىس دەپۋتاتتارى مەملەكەتتىك ورگاندار باسشىلارىنا دەپۋ­تات­تىق ساۋالدار جولدادى. ولار: ماقسات رامانقۇلوۆ, ەرلان سايروۆ, ەرلان سمايلوۆ, الەكساندر ميليۋتين, بەرىك دۇيسەنبينوۆ, ەكاتەرينا سمىشلياەۆا, ناتاليا دەمەنتەۆا, قۇدايبەرگەن ەرجان, ءمادي احمەتوۆ, ايجان سقاقوۆا, البەرت راۋ, ارتۋر پلاتونوۆ.

ءماجىلىستىڭ جالپى وتىرىسىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ازات سەمبينوۆتىڭ وكىلەتتىگىن مەرزىمىنەن بۇرىن توقتاتۋ تۋرالى قاۋلى قابىلداندى.

ورتالىق سايلاۋ كوميسسياسىنىڭ مۇشەسى اسىلبەك سماعۇلوۆتىڭ ايتۋىنشا, ءماجىلىس دەپۋتاتى ازات سەمبينوۆ مىندەتتەرىن اتقارۋدان ءوز ەركىمەن بوساتۋ تۋرالى ءوتىنىش بەرگەن.

– وسىعان وراي ورتالىق سايلاۋ كوميسسياسى سىزدەردىڭ نازارلارىڭىزعا زاڭناماعا سايكەس پارلامەنت ءماجىلىسىنىڭ دەپۋتاتى ازات سەمبينوۆتىڭ ءوتىنىش بەرۋىنە بايلانىستى ونىڭ وكىلەتتىگىن مەرزىمىنەن بۇرىن توقتاتۋ تۋرالى ماسەلەنى شەشۋ ءۇشىن ۇسىنىم ەنگىزىپ وتىر, – دەدى ا. سماعۇلوۆ.

سونداي-اق قازاقستان رەسپۋبليكاسى پارلا­مەنتى ءماجىلىسىنىڭ دەپۋتاتى نۇرلىبەك وجاەۆ انت بەرىپ, اگرارلىق ماسەلەلەر كوميتەتىنىڭ قۇرامىنا سايلاندى.