اقمولا وبلىسىنىڭ پروكۋراتۋراسى مەملەكەتتىك تۇرعىن ءۇي قورىنان پاتەر ءبولۋ كەزىندە بىرقاتار زاڭبۇزۋشىلىق فاكتىلەرىن انىقتادى, دەپ حابارلايدى Egemen.kz وبلىستىق پروكۋراتۋرانىڭ ءباسپاسوز قىزمەتىنە سىلتەمە جاساپ.
ۆەدومستۆو ۇسىنعان مالىمەتكە سايكەس, وبلىستىڭ بارلىق اۋداندارىندا پروكۋرورلىق تەكسەرىس جۇرگىزىلۋدە. تەكسەرۋ شارالارى بارىسىندا كوكشەتاۋ قالاسىندا بيۋدجەتتىك ۇيىمنىڭ قىزمەتكەرى 2017 جىلى مەملەكەتتەن العان پاتەردى ءۇشىنشى تۇلعالارعا جالعا بەرەتىندىگى انىقتالدى.
«كوكشەتاۋ قالاسى پروكۋراتۋراسىنىڭ قاداعالاۋ اكتىسى بويىنشا اتالعان تۇلعا پاتەردەن كوشىرىلىپ, پاتەر كوپبالالى وتباسىنا بەرىلدى. استراحان اۋدانىندا 2017 جىلى بيۋدجەتتىك ۇيىمنىڭ قىزمەتكەرىنە مەملەكەت قورىنان پاتەر ۇسىنىلعان بولاتىن. 2020 جىلى قىزمەتكەر ءوز اتىنا بۇدان باسقا پاتەردى مۇرا رەتىندە قابىلداعانى انىقتالدى. بۇگىنگى تاڭدا مەملەكەت قورىنداعى پاتەر 11 جىل كەزەكتە تۇرعان جەتىم بالانىڭ پايدالانۋىنا بەرىلدى», دەپ ءتۇسىندىردى ۆەدومستۆودان.
تەكسەرۋ قورىتىندىسى بويىنشا مەملەكەت يگىلىگىنە 20 پاتەر قايتارىلدى.
«جاقىن ارادا پاتەرلەر قايتا ءبولىنىپ, ءبىرىنشى كەزەكتە حالىقتىڭ الەۋمەتتىك وسال توپتارىنا بەرىلەدى. بۇل باعىتتا جۇمىس ءارى قاراي جالعاسىن تاباتىن بولادى», دەپ تولىقتىردى ۆەدومستۆودان.