«تاليبان» قوزعالىسىنىڭ رەسمي وكىلى جاڭادان قۇرىلعان ۇكىمەتتەگى جاڭا تاعايىنداۋلار تۋرالى مالىمدەدى, دەپ حابارلايدى Egemen.kz.
بۇل تۋرالى The Khaama Press باسىلىمى مالىمدەدى.
قوزعالىس وكىلىنىڭ ايتۋىنشا, مينيسترلەر كابينەتىن قۇرۋعا ارنالعان ارنايى كەڭەس اياقتالعان, ناتيجەسى جاقىن ارادا جاريالانادى.
باسىلىم مالىمەتىنشە, اۋعانستاننىڭ سىرتقى ىستەر ءمينيسترى بولىپ «تاليبان» ساياسي قاناتىنىڭ جەتەكشىسى مولدا ابدۋل عاني بارادار تاعايىندالعان. سونداي-اق, ەلدىڭ قورعانىس مينيسترلىگىنىڭ باسشىسى قىزمەتىن قوزعالىس جەتەكشىسى مولدا وماردىڭ ۇلى مولدا ياكۋب اتقارادى. ىشكى ىستەر ءمينيسترى (ىىم) حاليف حاككاني, اعا باسشىلاردىڭ ءبىرى دجالالۋددين حاككانيدىڭ ۇلى بولدى.
سونداي-اق, تالىپتەر اۋعانستاننىڭ بۇرىنعى پرەزيدەنتى حاميد كارزايدى جانە بەيبىت كەلىسسوزدەردىڭ بۇرىنعى قاتىسۋشىسى ابدۋللا ابدۋللانى وتپەلى كەزەڭدە اۋعانستاندى باسقاراتىن 12 ادامنان تۇراتىن كەڭەسكە قوسقان.
اگەنتتىك مالىمەتى بويىنشا, جاقىن ارادا اۋعانستان ۇكىمەتىنىڭ تولىق قۇرامى جاريالانادى.
«ۇكىمەت كەلەسى بىرنەشە كۇندە قۇرىلادى. ءبىز پروتسەستى 90-95 پايىزعا اياقتادىق جاقىندا ناتيجەسىن جاريالايمىز», دەدى «تاليبان» وكىلدەرىنىڭ ءبىرى اناس حاككاني.